БҰҰ-ның Украинадағы кеңсесі таратқан баспасөз хабарламасында төрт жүк көлігінен құралған ұйымаралық колонна Билозерка елді мекеніне көмек жеткізуге тырысқан сәтте Ресейдің шабуылына ұшырағаны айтылып, бұл әрекет «мүлдем қабылдауға болмайтын жағдай» деп сипатталды.
Мәлімдемеде: «Гуманитарлық көмек қызметкерлері — БҰҰ Гуманитарлық мәселелерді үйлестіру басқармасы (OCHA) мен Дүниежүзілік денсаулық сақтау ұйымының (ДДҰ) өкілдері кіретін топ, бірнеше ай бойы көмек алмаған және соғыстың ауыр зардабын тартқан қауымға көмек жеткізу міндетін атқарып жүрген болатын», - делінді.
Шабуыл кезінде жарақат алған немесе қаза тапқандардың жоқ екені хабарланды, алайда колоннадағы екі жүк көлігінің зақымданғаны және «өртеніп кеткені» айтылды.
Баспасөз хабарламасында: «Гуманитарлық қызметкерлер мен гуманитарлық көлік құралдарын әдейі нысанаға алу — халықаралық гуманитарлық құқықтың өрескел бұзылуы және соғыс қылмысы. Бейбіт тұрғындар мен көмек қызметкерлерін қорғау үшін барлық шаралар қабылдануы тиіс. Халықаралық гуманитарлық құқыққа қатаң түрде құрмет көрсетілуі керек», - деп хабарланды.
Украинаның Сыртқы істер министрі Андрей Сыбига да “X” платформасында жасаған мәлімдемесінде шабуылды айыптап, БҰҰ мүше мемлекеттерін бұл әрекетті айыптауға және Мәскеуге қосымша қысым жасауға шақырды.
Министрдің үндеуін Украина Сыртқы істер министрлігінің “X”-тегі жеке мәлімдемесі де қолдады. Онда колоннадағы төрт жүк көліктің біреуі «толықтай жанып кеткені», екіншісі қатты зақымданғаны, қалған екеуінің «қашып құтылғаны» айтылды.
Ресей билігі әзірге БҰҰ айыптауына жауап берген жоқ.
Бұл айыптау сейсенбі таңертең Украина президенті Владимир Зеленскийдің мәлімдемесінен кейін келді. Ол елдің солтүстік-шығысындағы Харьков қаласында түн бойы жалғасқан Ресей әуе шабуылдарынан 57 адамның жараланғанын хабарлап, бұл әрекетті «нағыз террористік шабуыл» деп атады.
Зеленский серіктестерінен қосымша әуе қорғаныс жүйелерін сұрап, халықаралық қауымдастықты Ресейді «нақты келіссөз үстеліне отыруға» мәжбүрлеуге шақырды.
«Бейбітшілік тек күш арқылы қамтамасыз етілуі мүмкін», - деді ол.
Украина Әуе күштері “Telegram” арқылы түн ішінде Ресей ұшырған 96 дронның 69-ын атып түсіргенін хабарлады. Мәскеу бұл мәлімдемеге де жауап берген жоқ.
Соңғы апталарда Мәскеу мен Киев алдағы қыс алдында энергетикалық нысандарды нысанаға алды деп бірін-бірі жиі айыптап келеді.
