Украина құрлық әскерлерінің мәлімдемесіне сәйкес, Ресей Украинаның оқу-жаттығу бөлімін нысанаға алған. Шабуылда үш сарбаз қаза тауып, 18 сарбаз жараланған.

«29 шілде күні жау Украина құрлық әскерлерінің оқу-жаттығу бөлімшелерінің бірі орналасқан ауданға зымыранмен шабуыл жасады», - делінген құрлық әскерлерінің «Telegram»-дағы мәлімдемесінде.

Мәлімдемеде «Өкінішке қарай қауіпсіздік шараларына қарамастан әскер шығынын болдырмау мүмкін болмады. Сағат 21:30-дағы жағдай бойынша үш сарбаз қаза тауып, 18-і жараланды», - делінген. Мәлімдемеде шабуылдың қай жерде болғаны айтылмаған. Алайда кейбір әскери блогерлер шабуыл Украинаның солтүстік шекарасына жақын жердегі Чернигов облысында болды деп болжауда.

Маусым айында Ресейдің Украинаның орталығындағы тағы бір оқу-жаттығу нысанына жасаған шабуылынан 12 сарбаз қаза тауып, ондаған адам жараланды. Бұл шабуылдан кейін Украина құрлық әскерлері қолбасшысы отставкаға кетіп, кейін басқа қызметке ауыстырылған болатын.