Әзербайжан Францияны Оңтүстік Кавказдағы қазіргі шекаралық шиеленістерге байланысты ұстанымына орай “екіжүзділікпен” айыптады. Бұл айыптау Франция Сыртқы істер министрінің мәлімдемелерінен кейін айтылды.
Таңғы уақытта Жан-Ноэль Барро Люксембургте өткен ЕО Сыртқы істер кеңесінің отырысы алдында журналистерге берген сұхбатында Париждің Әзербайжан мен Армения шекарасындағы шиеленістің ушығуына алаңдайтынын жеткізді. Сондай-ақ ол Еуроодақтың аймақтағы миссиясы кеңейіп, шиеленісті бақылап, тежеуге көмектеседі деген үмітін білдірді.
Барро екі ел арасында түпкілікті бейбіт келісімге қол қойылуын және өзі “еріксіз тұтқындар” деп атаған адамдардың босатылуын да талап етті.
Әзербайжан Сыртқы істер министрлігінің өкілі Айхан Хажызаде “X” әлеуметтік желісінде жариялаған мәлімдемесінде Францияның Ереванға қару жеткізуі мен “Әзербайжанға қарсы ұзақ жылдар бойғы ұстанымы” Барро айтқан аймақтық алаңдаушылықпен қайшы келетінін және бұл әрекеттердің бейбітшілікке үлес қоспайтынын атап өтті.
“Бұл қос стандарттар Францияның екіжүзділігін айқын көрсетеді,” – деді Хажызаде. Ол бейбіт келісімге қол жеткізу және аймақта тұрақты тыныштық орнату үшін “негізгі мәселелерді” шешу қажеттігін баса айтты. Әсіресе Бакудің жиі көтеретін мәселелерінің бірі – Армения Конституциясында Әзербайжанға бағытталған аумақтық талаптардың болуы.
