Сәрсенбі күні жарияланған зерттеуге сәйкес, өткен аптадан бері Еуропаны шарпыған аптап ыстық 2,300-ге жуық адамның өмірін қиды.
Лондонның «Imperial College London» мен Лондон гигиена және тропикалық медицина мектебінің ғалымдарының зерттеулеріне сәйкес, 2300-ге жуық өлімнің 1500-ге жуығы (65%) қатты ыстық толқыны тудырған климаттық дағдарысқа байланысты болған.
Зерттеу көрсеткендей климаттық дағдарыс жаздың басында Еуропада ыстыққа байланысты өлімді үш есе арттырды.
23 маусым мен 2 шілде аралығындағы 10 күндік аптап ыстыққа назар аударған ғалымдар Лондон, Париж, Франкфурт, Будапешт, Загреб (Хорватия), Афины, Рим, Милан, Сассари (Италия), Барселона, Мадрид және Лиссабонды қоса алғанда Еуропаның 12 қаласын зерттеген.
Зерттеуде «Осы талдаудың және басқа да көптеген зерттеудің нәтижелері анық: климаттық дағдарысқа байланысты Еуропада аптап ыстық артуда», - делінген.
Рекордтық аптап ыстық
Зерттеу ауа температурасының артатынын және бұл өлім көрсеткішінің көбеюіне әкелуі мүмкін екенін ескертіп отыр.
Еуропалық Одақтың Коперникус климаттың өзгеруі қызметі сәрсенбі күні жариялаған айлық климаттық бюллетеньде 2025 жылдың маусым айы жаһандық деңгейде тарихтағы үшінші ең ыстық маусым айы болғанын мәлімдеді.
Еуропаның Орта мерзімді ауа райын болжау орталығының климаттық стратегия бойынша жетекші маманы Саманта Бёрджесс: «2025 жылдың маусым айында Батыс Еуропа аумағын қамтыған ерекше аптап ыстық тіркелді. Бұл өңірдің көп бөлігі жылу стресіне ұшырады. Бұл аптап ыстық Батыс Жерорта теңізіндегі теңіз температурасының рекордтық деңгейде көтерілуімен күшейе түсті», – деп атап өтті.
Ол сондай-ақ жиі қайталанатын аптап ыстық толқыны Еуропа халқына әсер етуі ықтимал екенін ескертті.
