Жуырда жүргізілген сауалнама еуропалықтардың жартысына жуығы АҚШ президенті Дональд Трампты «Еуропаның жауы» деп санайтынын, сондай-ақ көпшіліктің алдағы жылдары Ресеймен ашық соғыс қаупін «жоғары» деп бағалайтынын көрсетті.

Франциядағы «Eurobazooka» орталығы жүргізіп, «Cluster 17» және «Le Grand Continent» тарапынан бейсенбі күні жарияланған сауалнамаға сәйкес, Трампты Еуропаның «жауы» деп есептейтін еуропалықтардың үлесі қыркүйек айындағы алдыңғы сауалнамамен салыстырғанда төрт пайыз артып, 48 пайызға жеткен.

Сауалнама еуропалықтардың 51 пайызының алдағы жылдары Ресеймен ашық соғыс қаупін жоғары, ал 18 пайызының бұл тәуекелді өте жоғары деп бағалайтынын анықтады.

Сауалнамаға қатысушылардың шамамен үштен екісі яғни 69 пайызы өз елдерінің Ресей шабуылына әскери тұрғыда төтеп бере алмайтынын айтқан. Бұл көрсеткіш Португалия, Италия және Бельгияда 80 пайыздан асқан.

Сауалнамаға сәйкес, халықтың 55 пайызы АҚШ пен Қытайдың бірін таңдау орнына, екі державамен де бірдей қашықтықта болуды жөн көреді.

ЕО-да қалуды қолдау деңгейі 74 пайыз болған, ал қатысушылардың 19 пайызы одақтан шығуды қолдайды. Франция ˗ аз қолдау көрсеткен ел. Франциядағы сауалнамаға қатысушылардың 27 пайызы ЕО-дан шығуды қаласа, 12 пайызы шешім қабылдамаған.

Сауалнама еуропалықтардың 63 пайызының «Brexit»-ті сәтсіз қадам деп санайтынын және оның Ұлыбританияға теріс әсер еткенін көрсетеді.

Бұл сауалнама Франция, Италия, Испания, Германия, Польша, Португалия, Хорватия, Румыния және Грекияны қамтыған Еуропаның тоғыз елінде жүргізілген.