Эфиопия премьер-министрі Абий Ахмед бейсенбі күні жасаған мәлімдемесінде көрші елдерде көптен бері алаңдаушылық туғызған Ніл үстіндегі миллиардтаған долларлық алып бөгеттің құрылысы аяқталғанын және оның қыркүйек айында ресми түрде ашылатынын хабарлады.

2011 жылы 4 миллиард долларлық бюджетпен басталған “Ұлы Эфиопия Қайта өрлеу” бөгеті Африкадағы ең ірі гидроэлектр жобасы болып саналады. Бөгеттің ені 1,8 шақырым, биіктігі 145 метр құрайды.

Аддис-Абеба бұл бөгет Эфиопияның электрлендіру бағдарламасы үшін өмірлік маңызды екенін айтады. Алайда төменгі ағыс елдері ретінде Мысыр мен Судан бұл бөгеттің өзендегі су ағысын азайтып, ауыл шаруашылығына, ауыз суға және энергетика саласына теріс әсер етуі мүмкін деп алаңдайды.

Абий парламенттегі сөзінде: «Бөгет енді толық аяқталды, енді ресми ашылуға дайындық жүріп жатыр», – деп мәлімдеді.

«Төменгі ағыс елдері Мысыр мен Суданға жолдаумыз айқын: Қайта өрлеу бөгеті қауіп емес, ортақ мүмкіндік», – деп қосты Абий Ахмед. «Бұл бөгет өндіретін энергия мен даму тек Эфиопияны ғана емес, бүкіл аймақты өркендетеді».

Бұған дейін де су тапшылығы қатты байқалатын Мысыр бұл бөгетті Ніл өзенінен алатын су үлесіне өмірлік маңызды қауіп ретінде қарастырады және бөгетті толтыру мен пайдалану тәртібіне қатысты құқықтық міндеттемесі бар келісім талап етіп отыр.

Судан болса, су тасқынының алдын алу және Көк Нілдегі өзінің гидроэлектр бөгеттерін қорғау үшін Эфиопиядан бөгетті басқару мәселесінде үйлестіруді қамтамасыз етіп, деректермен бөлісуді сұрайды. Бөгет Судан шекарасынан небары 10 шақырым қашықтықта орналасқан.