Түркия Сыртқы істер министрі Хакан Фидан 2 қазан күні Біріккен Араб Әмірліктеріне (БАӘ) ресми сапармен аттанады. Бұл туралы Түркия Сыртқы істер министрлігі хабарлады.
Фидан соңғы рет БАӘ-ге 5 мамырда барған болатын. Сол сапарында ол мемлекет басшысы Шайх Мұхаммед бен Заид Әл Нахаянмен кездесіп, Сыртқы істер министрі Шайх Абдулла бен Заид Әл Нахаянмен келіссөздер жүргізген еді.
Осы сапарында Фидан Түркияның БАӘ-мен көпжақты ынтымақтастықты одан әрі нығайтуға деген ұмтылысын атап өтеді. Сондай-ақ ол аймақтық мәселелер бойынша, оның ішінде 29 қыркүйекте АҚШ президенті Дональд Трамп жариялаған жоспардан кейін Газа аймағында атысты тоқтату мен бейбітшілік орнату жөніндегі күш-жігер туралы кеңес өткізеді.
Бұдан бөлек Хакан Фидан соғыстан зардап шеккен Сирияда тұрақтылық пен қайта құруды қамтамасыз ету үшін Сирия үкіметін қолдаудың маңыздылығына назар аударады.
Түркия мен БАӘ арасындағы екіжақты қарым-қатынастар соңғы жылдары айтарлықтай жақсарды.
2023 жылдың шілде айында Түркия президенті Режеп Тайып Ердоғанның БАӘ-ге сапары барысында екі ел Жоғары деңгейдегі стратегиялық кеңес құруға келісті, бұл қарым-қатынастарды стратегиялық серіктестік деңгейіне көтерді.
Жоғары кеңестің алғашқы отырысы 2025 жылдың 16 шілдесінде Анкарада өтті, оны Ердоған мен БАӘ мемлекет басшысы Шайх Мұхаммед бірлесіп басқарды.
БАӘ Түркияның Парсы шығанағындағы ең ірі сауда серіктесі болып табылады. 2024 жылы екіжақты сауда көлемі шамамен 16 миллиард долларға жетіп, екі ел арасындағы экономикалық өзара тәуелділіктің тереңдей түскенін көрсетті.
