Сәрсенбі күні жоғары әскери басшылармен бірге өткен телехабар кезінде Мадуро Венесуэлада Ресейде өндірілген қысқа қашықтықтағы “Игла- С” зымырандары бар екенін айтып, оларды елдің әуе қорғаныс жүйесінің маңызды бөлігі ретінде сипаттады.
Мадуро: «Бейбітшілікті қамтамасыз ету үшін біз негізгі әуе қорғаныс нүктелерінде кемінде 5 000 зымыран орналастырдық», - деп, бұл қарулардың ұлттық егемендікті қорғау үшін дайын тұрғанын атап өтті.
Өрши түскен шиеленіс
АҚШ ұзақ уақыттан бері социалистік басшының билігіне қарсы шығып келеді. Президент Дональд Трамп әкімшілігі Венесуэла жағалауларында шағын әскери-теңіз флотын орналастырған, ал Вашингтон бұл әрекетті есірткіге қарсы операцияның бір бөлігі ретінде сипаттауда.
АҚШ әскери ұшақтары Венесуэладан АҚШ-қа есірткі тасымалдады деген күдікке ілінген бірнеше қайықты жойған, алайда Каракас бұл айыптауларды жоққа шығарады.
Венесуэла билігі АҚШ операцияларын ел егемендігіне араласу деп атап, Вашингтонды есірткіге қарсы миссияларды агрессия үшін сылтау ретінде пайдалануда деп кінәлады.
Мадуро бұл қарулардың елдің «кез келген империалистік қатерге» қарсы дайын болуын қамтамасыз ететінін айтып, Венесуэла қарулы күштерінің «Отанның әрбір сантиметрін қорғауға әзір» екенін хабарлады.
