Жұма күні Стамбулда Палестинаны қолдаушы парламент тобының отырысына жиналған 13 елдің парламент спикерлері Израильдің 18 айға жуық уақыттан бері Газаға жасаған шабуылдарын айыптады. Сондай-ақ парламент басшылары әлемдік ұйымдарды Тель-Авивтің шабуылдарын тоқтату үшін әрекет етуге шақырды.

 Малайзия парламентінің спикері Тан Сри Дато Джохари бин Абдул елінің Палестинаның тәуелсіздігі мен егемендігін табанды түрде қолдауын жалғастыратынын мәлімдеді. Сондай-ақ ол Израильдің бейбіт тұрғындарды өлтіруін айыптады.

Пәкістан парламентінің спикері Сердар Аяз Садық Палестина мәселесінің саяси мәселе емес, ар-ождан сынағы екенін және Палестина халқынан әділет, бостандық абырой сезімі ұрланғанын мәлімдеді. Садық Израильдің гуманитарлық көмек конвойларына тосқауыл қойғанын, аймақты әдейі бомбалағанын және гуманитарлық көмек қызметкерлерін өлтіргенін атап өтті.

 Индонезия парламентінің спикері Пуан Махарани Палестинаға ең қажет нәрсенің әділдік екенін баса айтты. Парламенттердің өз өкілеттіктері аясында шешімнің бір бөлігі болуы керектігіне тоқталды. Махарани мәжіліс спикер ретінде үнсіз қалмау керек екенін және жауапкершілік тек сайлаушылар алдында ғана емес, әділдік, адамгершілік және бейбітшілік үшін де екенін айтты.

Испания парламентінің спикері Арменгол Сосиас бейне үндеуінде Газада 2023 жылдың қазан айынан бері болып жатқан оқиғалардың адамзатқа қарсы қылмыс екенін айтты. Сосиас: «Екі айлық атысты тоқтату келісімінен кейін Израиль оны бұзып, Газа халқын бомбалауды жалғастырды. Израиль балаларды өлтіруді, медициналық орталықтарды қиратуды, көмек қызметкерлері мінген жедел жәрдем көлігін шабуылдауды жалғастыруда. Қанды қырғын адам төзгісіз деңгейге жетті»,- деді.

Жазасыздық мәдениетінің жаһанға таралуын тоқтату керектігін атап өткен Сосиас Испанияның Палестина мемлекеті мен оның 1967 жылғы шекарасын мойындайтынын айтты. Испания Мәжілісінің төрағасы халықаралық құқыққа жасалған ашық шабуылдардың дереу тоқтатылуы керектігін баса айтты.

Әзербайжан Парламенті төрағасының орынбасары Али Ахмадов 30 жыл бойы оккупация мен этникалық тазартуды бастан кешірген Әзербайжанның әлемнің кез келген жерінде кемсітушілікті, адам құқықтарын бұзуды, этникалық тазалауды, басып алуды және жазықсыз адамдарға жасалған зорлық-зомбылықты айыптайтынын мәлімдеді.

Газадағы гуманитарлық дағдарыс пен мыңдаған жазықсыз адамның қаза болуына байланысты терең алаңдаушылық білдірген Ахмадов аймақтағы азық-түлік, су және денсаулық сақтау қызметтерінің жетіспеушілігі адамдарды аштыққа душар етіп, жағдайды одан әрі ушықтырғанын айтты.

 Ахмадов «Газада гуманитарлық көмектің жоқтығы жағдайды қиындатуда. Атысты тоқтату келісімі орнатылып, толық орындалуы керек», - деді.

Әзербайжанның Палестинаның тәуелсіздігін қолдайтынын және Палестина елшілігінің Бакуде 14 жылдан бері жұмыс істеп келе жатқанын еске салған Ахмадов «Палестина халқының өз елінде абырой мен қауіпсіздікте өмір сүруі аймақтық бейбітшілік пен тұрақтылық үшін өте маңызды», -  деді.

Ахмадов Израиль-Палестина мәселесін шешудің халықаралық құқық пен БҰҰ-ның тиісті қарарлары аясында екі мемлекетті шешім арқылы мүмкін екенін баса айтты.

Ахмадов «Әзербайжан Ислам Ынтымақтастығы Ұйымының мүшесі ретінде Газа халқымен ынтымақтастығын анық білдірді», - деді.