Иран Ормуз бұғазында «заңсыз өтуге әрекет жасаған» супертанкердің екі теңіз минасына соғылып, өртенгенін хабарлады.
Иран Ислам революциясы сақшылар корпусының Әскери-теңіз күштері таратқан жазбаша мәлімдемеде: «Ормуз бұғазының оңтүстігінен заңсыз бағытпен өтуге әрекет жасаған супертанкер екі теңіз минасына соғылғаннан кейін өртеніп, толықтай тоқтады», – делінген.
Мәлімдемеде Ормуз бұғазындағы «қауіпсіздік талаптарын бұзған кемелердің де жағдайы осындай болады» деп ескертілді.
«Ислам революциясы сақшылар корпусының Әскери-теңіз күштері белгілеген бұғаздан өту және кеме қатынасы ережелерін сақтау міндетті. Теңіз тасымалы компаниялары АҚШ армиясының арандатушылық әрекеттеріне ермеуі керек және кеме экипаждарының өмірі мен мүлкін орынсыз қауіп-қатерге тікпеуі тиіс», – делінген мәлімдемеде.
