Түркияның Энергия және табиғи ресурстар министрі Алпарслан Байрактар Түркияның құрлықта және теңіз аймақтарында мұнай мен газ барлауды қамтитын жаңа энергетикалық келісімге Пәкістанмен қол қоюды жоспарлап отырғанын мәлімдеді. Байрактар сәрсенбі күнгі мәлімдемесінде келесі апта келісімді ресми түрде бекіту үшін Пәкістанға баратынын айтты.
Байрактар «Lider Haber» арнасына берген сұхбатында: «Пәкістанда алғашқы терең бұрғылауға және теңіз аймақтарына қатысты келісімге қол қоямыз. Екі құрлық алаңында және бір теңіз алаңында бірлескен жұмысты бастаймыз»,- деді.
«Daily Sabah» таратқан мәліметке қарағанда, қол қою рәсімі сейсенбі күні өтуі мүмкін.
Пәкістан үкіметі ақпан айында Макран және Индус алаңдарында барлау лицензияларын беру үшін 40 теңіз блогын тендерге шығарғанын хабарлаған болатын.
Түркия мен Пәкістан сәуір айында Пәкістандағы осы 40 бөлек блокты қамтитын теңіз аймақтарында мұнай және табиғи газ барлау тендеріне бірге қатысу туралы келісімге қол қойған еді.
Пәкістанның «Mari Energies Limited», «Oil and Gas Development Company Limited» және «Pakistan Petroleum Limited» компаниялары Түрік мұнай компаниясымен бірге теңіз тендерлеріне бірге қатысуға келісім жасасты.
Түркия Сыртқы істер министрі Хакан Фидан шілде айында Исламабадқа жасаған ресми сапары барысында түрік компанияларының Пәкістанның теңіздегі қорларында мұнай және газ барлау жұмыстарын жүргізетінін мәлімдеді.
Пәкістанның вице-премьері әрі Сыртқы істер министрі Мұхаммед Ишак Дармен өткізген бірлескен баспасөз мәслихатында Фидан Анкараның Исламабадпен экономикалық және энергетикалық ынтымақтастықты тереңдетуге ниетті екенін атап өтіп, екі ел арасындағы сауда айналымын 5 миллиард долларға дейін ұлғайту үшін жұмыс жүргізілетінін айтты.
Түрік мұнай компаниясы қазан айында Исламабад қайта жандандырған теңіз аймақтарында энергетикалық барлау бастамасы аясында Пәкістанның «East Offshore Indus Block-C» блогында 25% үлес және операторлық құқықтарды иеленген болатын.
