НАТО Бас хатшысының орынбасары Радмила Шекеринска 7–8 шілдеде өтетін Анкара саммитінде міндеттемелерді нақты әрекетке айналдыру көзделгенін мәлімдеді.
Шекеринска бұл туралы Литваның астанасы Вильнюсте өткен НАТО Парламенттік ассамблеясының көктемгі сессиясында айтты.
Румыния аумағына ұшқышсыз ұшу аппаратының (ҰҰА) құлауы оқиғасынан кейін осы елмен толық ынтымақтастықта екенін тағы да атап өткен Шекеринска одақтастар Ресейдің не істеуі мүмкін екенін, оған қаншалықты дайын екенін және оның әрекеттері қаншалықты бейберекет сипат алып бара жатқанын жақсы білетінін жеткізді.
Шекеринсканың айтуынша, Ресейдің жауапсыз әрекеттері баршаға қауіп төндіреді, ал оның Украинаға қарсы шабуылдары альянс қауіпсіздігіне де тікелей әсер етеді.
«Біздің басты міндетіміз – әрдайым сақ болу»
«Сондықтан НАТО-ның, яғни біздің басты міндетіміз – әрдайым сақ болу. Әсіресе Ресейдің одағымызға төндіретін қаупі Украинадағы соғыс аяқталған күннің өзінде жойылмайтынын білетін кезеңде. Ресей өз бюджетінің 40 пайызын қорғанысқа жұмсап отыр. Бейбітшілікке мүдделі мемлекет бұлай істемейді. Қолданыстағы тәртіпті сақтағысы келетін күш те бұлай әрекет етпейді», – деді ол.
Сонымен қатар Қытайдың да өз әскери әлеуетін ашық жарияламай, қарулы күштерін жаңғыртып, ядролық әлеуетін кеңейтуді жалғастырып жатқанын айтқан Шекеринска Иранның да ұзақ уақыттан бері ядролық және баллистикалық зымыран бағдарламалары арқылы қауіп төндіріп келе жатқанын атап өтті.
«Демек, қорытынды анық. Қауіпті әрі тұрақсыз әлемде біз өз қауіпсіздігімізге инвестиция салып, қорғанысымызды бірлесіп күшейтуіміз керек. Мұны да тек бірге жүзеге асыра аламыз», – деді ол.
Шекеринска Анкара саммитіне қатысты күтілетін нәтижелер мен жолданатын үндеудің айқын екенін атап өтіп, «Енді міндеттемелерді нақты іске айналдыруымыз керек», – деді.
Оның айтуынша, Анкара саммитінде қаржылық ресурстарды жауынгерлік дайындық мүмкіндіктеріне айналдыру, қорғаныс өнеркәсібін едәуір кеңейту және Украинаға берілетін күшті қолдауды жалғастыру мәселелері басты назарда болады.
«Саммиттің басты мақсаты – нақты нәтижелерге қол жеткізу», – деп түйіндеді Шекеринска.
