АҚШ-тың Мемлекеттік хатшысы Марко Рубио ресейлік әріптесімен кездесуде Украинадағы соғысты шешу жолындағы ілгерілеудің жоқтығына «ренішін және ашуын» білдіргенін айтты.
Рубио бейсенбі күні Малайзияда өткен АСЕАН отырысы кезінде Сергей Лавровпен кездесті. Ол кездесуден кейін журналистерге: «Президент (Дональд Трамп) не айтса, мен де соны қайталадым, бұл - әрі реніш, әрі ашу», - деді.
Аталған кездесу Украинадағы соғыстың созылуына байланысты АҚШ Президенті Дональд Трамптың Ресей Президенті Владимир Путинге деген ренішінің күшейіп тұрған кездегі Рубио мен Лавровтың екінші бетпе-бет жүздесуі болды.
Бейсенбі күні Ресейдің ұшқышсыз ұшатын аппараттары мен зымырандары Украина астанасы Киевке шабуыл жасады. Ресей шабуылдарының артуы Украинаның әуе қорғаныс жүйесіне ауыртпалық түсірді. Мыңдаған адам түн ішінде метроларға жасырынуға мәжбүр болды.
Украина Президенті Владимир Зеленский Ресей Киевке жасаған шабуылда 18 зымыран мен шамамен 400 ұшқышсыз ұшақ ұшырғанын мәлімдеді.
Ауқымды санкциялар
Мәскеу бұл мәселеге қатысты ешқандай түсініктеме бермей, алдыңғы түн көршісіне 728 ұшқышсыз ұшақпен рекордтық деңгейде шабуыл жасады.
АҚШ Украинаға қорғаныс қаруларын жеткізуді қайта бастауға бұйрық бергеннен кейін бір күн өткен соң сейсенбі күні Трамп сыншыл ұстаным танытып, Путиннің бейбітшілікке қатысты мәлімдемелерін «мағынасыз» деп атады.
Сондай-ақ Трамп Ресейге қатаң санкциялар енгізетін заңнаманы, соның ішінде ресейлік мұнайды, газды, уранды және басқа да экспорт өнімдерін сатып алатын елдерге 500 пайыздық баж салығын енгізуді қарастыратынын айтты.
Рубио мен Лавров Трамптың қарым-қатынастарды қалпына келтіру және соғысты тоқтату келіссөздері аясында ақпан айында Сауд Арабиясында алғаш рет кездескен болатын.
Кремль сәрсенбі күні Трамптың сынына мән бермей, Вашингтонмен қарым-қатынастарды түзетуге тырысатынын мәлімдеді.
Сәрсенбі күні Римде Украинаны қолдайтын елдер ұйымдастырған конференция аясында Трамптың Украина жөніндегі арнайы өкілі Кит Келлогг Украина Президенті Владимир Зеленскиймен кездесті.
