Қазақстан жұма күні Еуропадағы Қарулы Күштер туралы шартқа қатысуын тоқтатқанын жариялады. Бұл туралы жарлыққа президент Қасым-Жомарт Тоқаев қол қойып, құжат президенттің ресми сайтында жарияланды.

Еуропадағы Қарулы Күштер туралы шартқа 1990 жылдың қараша айында Парижде 16 НАТО мемлекеті мен Варшава шарты ұйымының алты мүше елінің өкілдері қол қойған болатын. Шарт Атлант мұхитынан Орал тауларына дейінгі Еуропа аймағында орналастырылатын соғыс танктерінің, броньды ұрыс машиналарының, калибрі 100 мм және одан үлкен артиллериялық жүйелердің, жойғыш ұшақтар мен шабуылшы тікұшақтардың санына шектеу енгізді.

Нәтижесінде жиырма сегіз мемлекет шартты қабылдады. Шарттың жаңартылған нұсқасы 1999 жылы Стамбулда өткен Еуропадағы қауіпсіздік және ынтымақтастық ұйымы саммитінде ұсынылды. Бұл жаңартылған мәтінді тек Ресей, Беларусь, Қазақстан және Украина мақұлдады.

Ресей 2007 жылы Еуропадағы Қарулы күштер туралы шартқа қатысуын тоқтатты және 2023 жылы НАТО-ның кеңеюі шартта белгіленген шектен асып кетті деген алаңдаушылық білдіріп, келісім шартқа өзгеріс енгізуді ұсынды. Алайда ымыраға келу мүмкін болмады.

НАТО елдері Ресейдің шартты сынға алуына жауап ретінде Мәскеудің шартқа қатысуын уақытша тоқтата тұру туралы шешім қабылдады.
Кейін Беларусь, Украина, Түркия, Мажарстан, Молдова және басқа да бірқатар мемлекет осындай шешім қабылдағанын хабарлады.