Израильге кіруіне тыйым салынған 11 депутаттың қатарындағы Ұлыбритания парламентінің мүшесі Зара Султана бұл шешімді «құрмет белгісі» деп атап, өзін «қорқытып, үнсіз қалдыру мүмкін емес» екенін мәлімдеді.
Султана “X” әлеуметтік желісіндегі парақшасында: «Израиль жаңа ғана маған елге кіруге тыйым салды. Геноцид, апартеид және заңсыз оккупация жүргізіп отырған фашистік үкімет туралы сөз болғанда мен мұны құрмет белгісі деп қабылдаймын», – деп жазды.
Султана Ұлыбритания үкіметі сейсенбі күні таңертең оккупацияланған Батыс Шериядағы Израильдің заңсыз қоныстарына қатысты саудаға тыйым салатынын жариялағаннан кейін Израильге кіруіне тыйым салынған 11 британдық депутаттың бірі болды.
“Your Party” («Сенің партияң») атынан Ковентри-Саут сайлау округінің депутаты Султана «Израильдің геноцидіне және Ұлыбританияның оған қатыстылығына» қарсы пікірін ашық айтуды жалғастыратынын білдірді.
Ол жаңа үкіметті «палестиналықтарға қарсы геноцид жасап отырған мемлекетті қаруландыруды, онымен сауда жасауды және ынтымақтастық орнатуды» жалғастырып отыр деп айыптады.
«Керісінше, бұл тыйым менің дауысымды бұрынғыдан да қаттырақ шығара түсуге деген табандылығымды күшейтеді. Бір күні Иерусалимге оккупацияланған қала ретінде емес, палестиналықтар тым ұзақ уақыт бойы айырылып келген еркіндікке, қадір-қасиетке және теңдікке қол жеткізген, баршаға тең құқық берілетін біртұтас мемлекет аясындағы азат әрі тәуелсіз Палестинаның бір бөлігі ретінде баруды асыға күтемін», – деді депутат.
«Геноцид жазасыз қалмауы тиіс»
Султанадан бөлек, Израильге кіруіне тыйым салынған депутаттар қатарында Джереми Корбин, Наз Шах, Дайан Эбботт, Джон Макдоннелл, Ричард Бёргон, Ханна Спенсер, Карла Денье, Сиан Берри, Элли Чоунс және Адриан Рэмзи бар.
Израильге кіруіне тыйым салынған “Your Party” партиясының тағы бір депутаты Джереми Корбин Палестинаның барлық аймағына бірнеше рет барғанын айтып, онда «оккупацияның қасіретін, сонымен бірге Палестина халқының төзімділігі мен адамгершілігін өз көзімен көргенін» мәлімдеді.
Корбин “X” әлеуметтік желісіндегі жазбасында: «Израильдің геноциді жазасыз қалмауы тиіс. Мен Палестина халқының бейбітшілігі, бостандығы мен әділдігі үшін өз пікірімді ашық айтуды жалғастырамын», – деді.
Ал “Your Party” таратқан мәлімдемеде: «Израиль Палестинамен ынтымақтастық қозғалысын Ұлыбританияның сыртқы саясатына жүргізіп келген ветосының тоқтауына себепкер деп санап, “Your Party” депутаттары Джереми Корбин мен Зара Султанаға елге кіруге тыйым салды. Бұл – дұрыс шешім!» – делінген.
Шах болса, тыйым салынған депутаттар тізімінің қандай негізде жасалғанын білмейтінін және тізімнің кездейсоқ жасалғандай көрінетінін айтты.
Ол “X” платформасында: «Алайда мен бір мәселеге қатысты ұстанымымды анық айта аламын. Бұл – жылдар бойы дәйекті түрде қорғап келе жатқан көзқарасым: Ұлыбритания үкіметі халықаралық құқық бойынша заңсыз деп танылған оккупацияланған Палестина аумақтарындағы Израильдің заңсыз қоныстарымен сауданы тоқтату үшін нақты қадам басуы тиіс», – деп жазды.
Эд Милибэнд сейсенбі күні таңертең Қауымдар палатасында депутаттар алдында сөйлеген сөзінде бүгінгі күнді Израильге қатысты «жаңа көзқарастың бастауы» деп атап, Ұлыбританияның заңсыз қоныстардан әкелінетін тауарларға импорттық тыйым енгізетінін мәлімдеді.
