Израильдің мемлекеттік хабар таратушысы “Kan” агенттігінің хабарлауынша, оңшыл көзқарастағы Ұлттық Қауіпсіздік министрі Итамар Бен-Гвир Израильдің бұрынғы премьер-министрі Нафтали Беннеттің жұбайына қарсы жала жабу ісін қозғап, оның нәтижесінде Беннет шамамен 35 000 шекель (10 000 АҚШ доллары) өтемақы төлеген.
“Haaretz” газетінің жазуынша, бұл іс Гилат Беннеттің «Бен-Гвирдің партия белсенділерін өз үйіне заңсыз кірді» деп айыптауынан туындаған.
Газет сонымен қатар Бен-Гвир істі қозғаған тұста Нафтали Беннет жайлы "отбасын ыдыратуы мүмкін" сипаттағы "әдептен тыс" ақпаратқа ие екенін айтқанын мәлімдеді.
“Kan” арнасының хабарлауынша, бір айдан кейін тараптар татуласуға келген, бірақ келісімнің егжей-тегжейі жарияланбаған.
«Бұл – ауыз жаптыру емес»
Беннет “X” платформасында жасаған мәлімдемесінде бұл жаңалыққа жауап ретінде татуласудың «ауыз жаптыруға бағытталған төлем» емес екенін атап өтті.
«Бірнеше жыл бұрын сайлау науқаны кезінде бұзақылар Беннеттер отбасының үйіне күшпен кірді. Осы оқиғаға байланысты Гилат Беннет бұл әрекетке Бен-Гвирдің жақтастарын кінәлап жазба жариялады... Бен-Гвир Гилат Беннеттің өз адамдарының атын атағаны үшін сотқа жүгінді, алайда бұл адамдардың шынымен оның жақтастары екеніне дәлел болған жоқ. Арағайындық барысында өтемақыны қамтыған келісімге қол жеткізілді және ол орындалды. Болғаны осы. Ауыз жаптыру жоқ, бопсалау жоқ, басқа ештеңе жоқ.» – деді ол.
Сәрсенбі күні таңертең Итамар Бен-Гвир Беннеттен алған өтемақыны Израиль Қорғаныс күштері сарбаздарына қайырымдылық ретінде аударғанын, әрі бұл әрекетін «уланған насихат машинасына сабақ» деп атағанын айтты.
Сондай-ақ ол бұл іс пен келісім сол кезде жария етілгенін, бірақ нақты сома бұрын айтылмағанын еске салды.
