Ресейдің ақпарат агенттіктерінің хабарлауынша, Ресей Қорғаныс министрлігінің әуе қорғаныс жүйелері бір түн ішінде Украинаның 323 дронын атып түсіргенін мәлімдеді. Осы уақытта екі тарап та шабуылдарын күшейте түсті.
Өңір губернаторының айтуынша, Ресейдің Орынбор облысындағы өнеркәсіптік нысанға бағытталған дрондар тойтарылған. Келтірілген шығын мен зардап шеккендер туралы мәлімет берілмеді.
Ресей тағайындаған губернатор Михаил Развожаевтың мәлімдеуінше, Ресей аннексиялаған Қырым түбегіндегі ең ірі қала Севастопольде Украина энергетикалық нысандарға соққы жасағаннан кейін электр қуаты өшкен.
Развожаев бұған дейін қала үстінде тоғыз украиналық дронның тойтарылғанын хабарлаған.
Ол Киевті тұрғындарды негізгі қызметтерден айырып, үрей туғызуға тырысып отыр деп айыптап, қала тұрғындарын қарт және көмекке мұқтаж көршілерінің жағдайын тексеруге әрі телефон байланысын тек төтенше жағдайлар үшін пайдалануға шақырды.
2014 жылы Ресей аннексиялаған Қырым түбегі Ресей әскері үшін маңызды логистикалық орталық болғандықтан, Украина шабуылдарының тұрақты нысанасына айналып отыр.
Харьковтағы адам өліміне әкелген шабуыл
Украинаның Харьков облысындағы Балаклия қаласына түнде жасалған дрон шабуылы салдарынан 56 жастағы әйел қаза тапты. Бұл туралы өңірлік әскери әкімшілік басшысы Олег Синегубов «Telegram» желісінде хабарлады.
Олег Синегубов тұрғын үйлерге зақым келтірілгенін және шабуыл кезінде 21 жастағы әйелдің қатты күйзеліске ұшырағанын жеткізді.
«Reuters» агенттігі тараптардың соңғы шабуылдары туралы мәліметтерді тәуелсіз түрде растай алмағанын мәлімдеді.
Бұл шабуылдар Ресей мен Украина соңғы апталарда соғыс қимылдарын күшейткен кезеңде болды. Ал АҚШ-тың араағайындығымен жүргізіліп жатқан және қақтығысты тоқтатуға бағытталған келіссөздер әзірге нақты нәтиже бермей отыр.
