Израиль армиясының 10 әскери көліктен тұратын жасағы Сирияның оңтүстігіндегі Дера провинциясының ауылдық аймағында орналасқан Жәмлә ауылына басып кіріп, рейд жасағаны хабарланды.
Сирияның мемлекеттік «Әл-Ихбария» телеарнасының хабарлауынша, Израиль әскери жасағы Жәмлә ауылына кіріп, елді мекеннің ішінде орналасқан.
Хабарда 10 әскери көліктен тұратын Израиль жасағының Дера аумағына кіргені айтылды. Сондай-ақ Израиль әскерилерінің күндіз Дераның ауылдық аймағындағы Мария ауылында бейбіт тұрғындардың үйлерін ірі калибрлі пулеметтермен атқылағаны хабарланды.
Израиль армиясының 30 тамызда да Кунейтраның солтүстігіндегі ауылдық аймақта орналасқан Таранжа ауылына кіріп, үйлердің біріне рейд жасап, тінту жүргізгені еске салынды.
Сирия Сыртқы істер министрлігі бұған дейін халықаралық қауымдастықты Израильдің Сирияның оңтүстігіндегі қайталанған заң бұзушылықтарын тоқтату үшін қажетті шаралар қабылдауға шақырған болатын.
Министрлік Израиль күштерінен өздері кірген Сирия аумақтарынан дереу әрі толықтай шығуды, 1974 жылғы келісімде қарастырылған күштерді ажырату шебіне оралуды, сондай-ақ Сирияның егемендігі мен аумақтық тұтастығын құрметтеуді талап еткен еді.
Израиль армиясы Башар Асад режимі құлатылған 2024 жылғы 8 желтоқсаннан бері 1974 жылы қол қойылған Күштерді ажырату туралы келісімді бұзып, Сирияның оңтүстігіндегі өзі басып алған Дера және Кунейтра провинцияларында 10 база мен әскери бекет салған.
Сирия президенті Ахмед Шараның бұған дейінгі мәлімдемесіне сәйкес, Израиль армиясы 2024 жылғы 8 желтоқсан мен 2025 жылғы 18 шілде аралығында Сирияның әртүрлі аймақтарына 1 000-нан астам әуе шабуылын жасап, шамамен 400 құрлық рейдін жүргізген.
