Жалған ақпаратпен күрес орталығы Уганда Қарулы күштері Бас штабының бастығына қатысты Түркия Сыртқы істер министрлігінің логотипі мен ресми бланкісі пайдаланылып таратылған мәлімдеменің жалған екенін хабарлады.

Орталық дүйсенбі күні жасаған мәлімдемесінде: «Сыртқы істер министрлігінің эмблемасы мен ресми бланкісі қолданылып, «Уганда Бас штаб бастығы Мухузи Кайнеругабаның қоқан-лоққылары туралы» деген тақырыппен жарияланған мәтін толығымен жалған. Сыртқы істер министрлігінің немесе тиісті мекемелердің ресми сайттары мен ресми байланыс арналарының ешқайсысында мұндай мәлімдеме немесе хабарландыру жарияланбағанын Угандадағы елшілігіміз хабарлады», – делінген.

Мәлімдемеде аталған жалған құжаттың цифрлық құралдардың көмегімен қолдан жасалғаны және қоғамды жаңылыстыруды көздейтіні атап өтілді.

Жалған ақпаратпен күрес орталығы шындыққа жанаспайтын ақпарат пен қолдан жасалған құжаттарға негізделген мұндай әрекеттерге сенбеуге шақырды. Сондай-ақ ресми ақпарат алу үшін тек Түркия Республикасының тиісті мемлекеттік мекемелерінің ресми ақпарат арналарына жүгіну қажеттігі ескертілді.