Иранның Сыртқы істер министрі Аббас Аракчи Пәкістан мен Ауғанстанды әскери қақтығыстардың ушығуын диалог арқылы реттеуге шақырып, екі көрші ел арасындағы келіссөзді жеңілдету үшін Тегеранның арағайын болуға дайын екенін білдірді.

Аракчи жұма күні “X” желісіндегі парақшасында былай деп жазды: «Қасиетті Рамазан айында ислам әлемінде рухани тазару мен ынтымақ нығая түсетін осы кезеңде Ауғанстан мен Пәкістанның қазіргі келіспеушіліктерін тату көршілік рухында әрі диалог арқылы басқаруы және шешуі орынды болар еді».

Министр сондай-ақ: «Иран Ислам Республикасы екі ел арасындағы диалогты ілгерілетуге, өзара түсіністік пен ынтымақтастықты нығайтуға бағытталған кез келген көмек көрсетуге дайын», - деп қосты.

Сонымен қатар ирандық министр парсы ақыны Сагди Ширазидің мына бір шумағын келтірді:
«Адам баласы — біртұтас дененің мүшелері,
Өйткені барлығы бір жаратылыстан жаралған».

Бұл үндеу Исламабад пен Кабул арасындағы қарым-қатынас айтарлықтай шиеленіскен кезеңде жасалды.

Ауған ресми өкілдерінің мәліметінше, Пәкістан әскері Кабул астанасын, сондай-ақ Кандагар мен Пактия провинцияларын қоса алғанда Ауғанстанның бірнеше аймағына әуеден соққы берген.

Жергілікті уақыт бойынша шамамен түнгі 02:30-да Кабулдың орталық бөлігінде бірқатар ірі жарылыс тіркелген.

Ауған үкіметінің өкілі шабуыл салдарынан адам шығыны болмағанын хабарлады.

Алайда Пәкістан премьер-министрінің өкілі Мушерраф Заиди қарымта соққы нәтижесінде 133 ауған сарбазы қаза тауып, 200-ден астамы жараланғанын мәлімдеді. Ол сондай-ақ 27 ауған әскери бекетінің, екі корпус штабының және 80-нен астам танк пен броньды техниканың жойылғанын айтты.

Пәкістандағы қауіпсіздік көздері Кандагарда бір оқ-дәрі қоймасы мен бір логистикалық базаның соққыға ұшырағанын жеткізді.

Ауғанстан Қорғаныс министрлігі Ауғанстан–Пәкістан шекарасы бойындағы пәкістандық позицияларға қарсы жүргізілген операциясы түн ортасында аяқталғанын мәлімдеді.

Осы апта басында төрт сағатқа созылған шекаралық қақтығыста кемінде сегіз ауған сарбазы мен екі пәкістандық сарбаз қаза тапқан. Бұл соңғы айлардағы ең қанды қақтығыстардың бірі ретінде тіркелді.

Қазіргі ушығу Исламабадтың өткен аптада жасаған әуе шабуылдарында 70 «террористің» жойылғанын білдіргеннен кейін болды.

БҰҰ Бас хатшысы Антониу Гутерриш жағдайға алаңдаушылық білдірді. Оның баспасөз хатшысы Гутерриштің тараптарды халықаралық құқық аясындағы міндеттемелерін сақтауға және дағдарысты дипломатиялық жолмен шешуге шақырғанын айтты.

Екі ел арасындағы қарым-қатынас Пәкістанның «Техрик-и Талибан Пәкістан» ұйымына мүше содырлар Ауғанстан аумағынан әрекет етеді деген айыптауларынан кейін нашарлаған. Кабул бұл айыптауларды жоққа шығарып отыр.