Сомали жағалауы, Аден шығанағы, Арабия теңізі және айналасындағы су айдындарына Түркия Әскери-теңіз күштерін жіберу мерзімін 2026 жылдың 10 ақпанынан бастап тағы бір жылға ұзарту туралы шешім Ресми Газетте жарияланды.
Ұзартудың мақсаты ˗ Түркия туы астында жүзетін және Түркиямен байланысты коммерциялық кемелерді қорғау, қарақшылыққа, тонауға және теңіз терроризміне қарсы халықаралық күш-жігерге үлес қосу, гуманитарлық көмек қызметін қолдау, сондай-ақ елдің теңіздегі тәжірибесін және халықаралық ынтымақтастығын нығайту.
Түркия 2009 жылдан бері НАТО-ның «Мұхит қалқаны» операциясына (Operation Ocean Shield), сондай-ақ 2009–2025 жылдар аралығында жеті рет қолбасшылық еткен Біріккен 151-тапсырма күшін (Combined Task Force 151 (CTF-151) қоса алғанда халықаралық қарақшылыққа қарсы миссияларға белсенді түрде қатысып келеді.
Ресми шешімде Сомалидің БҰҰ Бас хатшысына жасаған өтінішіне қарамастан, 2022 жылдан бері БҰҰ Қауіпсіздік Кеңесі Аден шығанағы, Сомали аумақтық су айдындары және оған іргелес аймақтарда қарақшылық, тонау және теңіз терроризмімен күреске қатысты бұрынғы өкілеттіктерді жаңартатын ешқандай шешім қабылдамағаны атап өтілді.
Сондай-ақ 2008 жылы қабылданған БҰҰ Қауіпсіздік Кеңесінің 1851-қарары аясында Сомалидің аумақтық су айдындарынан тыс аймақтарда қарақшылық пен теңіз қылмыстарына қарсы халықаралық операциялардың жалғасып жатқанына назар аударылды.
Бұл қадам ˗ халықаралық құқыққа сай Түркияның теңіз қауіпсіздігін, кеме қатынасы еркіндігін және жаһандық бейбітшілік пен тұрақтылықты қолдау жөніндегі халықаралық, әрі ұлттық міндеттемелерінің бір бөлігі.
