АҚШ Өкілдер палатасы Украинаға қосымша 1,8 миллиард доллар көлемінде көмек бөлуді және Ресейге қарсы санкцияларды күшейтуді көздейтін заң жобасын мақұлдады.
Заң жобасы бейсенбі күні 195 қарсы дауысқа 226 дауыспен қабылданды. Республикалық партияның 18 мүшесі демократтарды қолдады.
Құжатты Өкілдер палатасының Сыртқы істер комитетіндегі жетекші демократ Грегори Микс ұсынды.
Заң жобасын қолдаушылар оның Украинаға елеулі қолдау көрсететінін, сондай-ақ Ресейдің мұнай-газ секторына қатысты санкцияларды арттырып, Ресеймен жұмыс істейтін қаржы ұйымдарына қойылатын шектеулерді күшейтетінін айтты.
Құжат Сенаттың қарауына жіберілді. Қабылдануы үшін кемінде 60 сенатор қолдауы тиіс. Алайда заң жобасы Сенаттан өткен күннің өзінде оны АҚШ президенті Дональд Трамп мақұлдауы керек.
АҚШ Конгресіндегі екі партия өкілдерінің көбі Ресей–Украина соғысының алғашқы жылдары Киевке белсенді қолдау білдірген болатын. Алайда 2025 жылдың қаңтарында Дональд Трамп Ақ Үйге қайта оралғаннан бері оның республикашыл партиядағы жақын серіктестерінің бір бөлігі, соның ішінде Өкілдер палатасы мен Сенат басшылары Украинаға немқұрайлы ұстаным таныта бастады.
Трамп екінші президенттік мерзімі басталғалы бері санкцияларға қатысты шешімдердің тікелей Ақ Үйде қабылдануын қамтамасыз етіп келеді.
Украина Ресей президенті Владимир Путиннің талаптарымен келіспей бейбіт келіссөздерді тоқтатты.
АҚШ-та қабылданған Украинаны қолдау туралы заң елдің соғыстан кейін қалпына келуін қолдайтын шараларды қамтиды. Құжатта Украинаға 1 миллиард доллардан астам тікелей көмек көрсету және несиелер арқылы 8 миллиард долларға дейін қаражат бөлу қарастырылған.
Бұдан бөлек заң қаржы ұйымдарына, мұнай және тау-кен өндіру салаларына, сондай-ақ Ресейдің лауазымды тұлғаларына қатысты қатаң санкциялар мен экспорттық бақылау шараларын енгізуді көздейді.
