АҚШ Мемлекеттік хатшысы Марко Рубио Сирия Сыртқы істер министрі Асад Хасан Шайбанимен өңірлік қауіпсіздік пен екі ел арасындағы ынтымақтастықты арттыру мәселелерін талқылады.
АҚШ Мемлекеттік департаментінің өкілі Томми Пиготтың айтуынша, Рубио Сириядағы азшылық топтардың ел өміріне қатысу үдерісін жалғастырудың маңызын атап өтті.
Рубио сондай-ақ Сирияның ядролық қызметті бақылауға және атом энергиясын бейбіт мақсатта пайдалануға жәрдемдесетін БҰҰ-ның Атом энергиясы жөніндегі халықаралық агенттігімен ынтымақтастықта қол жеткізген ілгерілеуін жоғары бағалады.
Сирия Сыртқы істер министрлігінің мәлімдемесінде телефон әңгімесі барысында екі ел арасындағы қарым-қатынастар, оларды одан әрі дамыту және ынтымақтастықты нығайту жолдары қарастырылғаны айтылды.
Мәлімдемеде Шайбанидің Сирияға салынған санкциялардың алып тасталуына байланысты АҚШ тарапына ел атынан алғыс білдіргені атап өтілді.
«Телефон әңгімесі барысында өңірдегі жағдай мен соңғы оқиғалар, сондай-ақ Сирияның саяси және экономикалық салаларда өңірлік тұрақтылықты қолдаудағы маңызды рөлі талқыланды», – делінген мәлімдемеде.
