Түркия Президенті Режеп Тайып Ердоған елдің терроризмге қарсы ондаған жылдық күресінде тарихи бетбұрыс болғанын мәлімдеді. Бұл мәлімдеме Ирактың солтүстігінде PKK лаңкестері қару тастағаннан кейін жасалды.
«Бүгін жаңа күн; тарихта жаңа парақ ашылды», – деді Ердоған сенбі күні. Бұл қадамды «47 жылдық терроризм қасіретін» аяқтауға бағытталған шешуші қадам деп атады.
Жұма күні Ирактың солтүстігінде PKK-ның 30 лаңкесі үңгірдің аузында қаруларын өртеді, бұл әрекет Анкара тарапынан топтың таралуының бастамасы ретінде қабылданды.
Бұл оқиға PKK-ның Түркияға қарсы ұзаққа созылған лаңкестік әрекеттеріндегі ең маңызды қадамдардың бірі болып саналады. PKK-ны Түркия, АҚШ және Еуропалық Одақ лаңкестік ұйым ретінде таныған.
«Кеше терроризм қасіреті аяқталу процесіне кірді», – деді Ердоған. Президент «Түркия тарихындағы ауыр және қайғылы тарауды жаба бастады. Ұлы, қуатты Түркияның есіктері айқара ашылды» деді.
Терроризмнен азат Түркияға қадам
Бұл сәтті ұлттық сауығу және стратегиялық жеңіс ретінде сипаттай отырып, Ердоған өз үкіметінің терроризмнен азат Түркия құруға деген міндеттемесін қайталады және бірлік пен құқықтық реформалар арқылы алға жылжуға уәде берді.
«Біз парламентімізде осы процестің құқықтық талаптарын талқылайтын комиссия құрамыз», – деп мәлімдеді ол. «Біз бірге, иық тіресе жұмыс істейміз және барлық кедергілерді жеңеміз».
Ердоған бұл жетістік тек үкіметтің ғана емес, бүкіл түрік халқының жеңісі екенін атап өтті.
«Түркия жеңді, менің халқым жеңді. Түріктер, күрдтер, арабтар – біздің 86 миллион азаматымыздың әрқайсысы жеңіске жетті», – деді ол.
«Біз не істесек те, Түркия үшін, халқымыз үшін, тәуелсіздігіміз үшін, болашағымыз үшін жасаймыз» деді президент.
Ұлттық егемендікке деген берік ұстанымын баса айтқан Ердоған «Біз ешкімге еліміздің абыройын таптатпаймыз және басымызды ешқашан имейміз. Бірлігімізге, отанымызға, халқымызға немесе тыныштығымызға қауіп төндіретін ешқандай бастамаға жол бермейміз», – деп мәлімдеді.
