Дүниежүзілік денсаулық сақтау ұйымы Газадан 41 ауыр науқасты эвакуациялады.
БҰҰ өкілдері Газадағы денсаулық сақтау жүйесінің күйрегенін, жалғасып жатқан Израиль шабуылдарының салдарынан әйелдер, жаңа туған сәбилер мен ауыр науқастар аштық пен өлім қаупіне тап болғанын мәлімдеді.

ДДСҰ Бас директоры Тедрос Адханом Гебрейесус “X” платформасында жариялаған мәлімдемесінде Газада шамамен 15 000 науқас эвакуацияны күтіп отырғанын айтып, «Медициналық эвакуацияның жеделдетілуі үшін елдерді ынтымақтастық танытуға және барлық жолдардың ашылуына шақыруды жалғастырамыз».

Эвакуацияланғандардың басым бөлігі — Израильдің Газадағы екі жылдық геноциді кезінде жарақат алғандар. Қалғандары — өңірдегі күйреген денсаулық сақтау жүйесі енді емдей алмай отырған қатерлі ісік пен жүрек ауруы сияқты созылмалы дерттерге шалдыққан адамдар.

Соғыс басталғалы бері Газадан 7 000-нан астам науқас эвакуацияланды, олардың жартысынан көбін Мысыр қабылдады. Алайда Израиль 2024 жылдың мамырында Рафах шекара өткелін бақылауға алғаннан кейін эвакуация қарқыны күрт баяулады.

Сонымен қатар БҰҰ Халық қоры Бас директорының орынбасары Эндрю Сабертон Газадағы әйелдер мен жаңа туған сәбилер аштық пен ана денсаулығына арналған қызметтердің толық күйрегенін атап өтті.

Баспасөз мәслихатында Сабертон: «Газада көргендеріме еш дайын емес едім, ешкім бұған дайын бола алмайды. Жойқын көріністер дистопиялық фильм түсіріліміне ұқсайды. Басқаша айту мүмкін емес. Газа жермен-жексен болған»,- деді.

Ол Газадағы ауруханалардың 94 пайызының зақымданғанын немесе жойылғанын, ана өлімінің күрт артқанын атап өтті.

«Шала туған және салмағы төмен сәбилер енді барлық жаңа туғандардың шамамен 70 пайызын құрайды, ал әр үш жүктіліктің бірі жоғары қауіп тобына жатады», - деді Сабертон.

Бітімнің үміт бергенін айтқан ол жаңадан басталған шабуылдар отбасыларға «қайтадан үрей салғанын» жеткізді.