Қазақстандық теннисші Елена Рыбакина қытайлық Чжэн Циньвэньді 3:6, 6:1, 6:4 есебімен жеңіп, турнирдің жартылай финалына шықты.
Осы жеңістің арқасында Рыбакина дүйсенбі күні жаңартылатын әлемдік рейтингте Арина Соболенконы басып озып, бірінші орынға көтерілетіні анықталды. Осылайша Соболенконың 99 аптаға созылған көшбасшылығы аяқталмақ.
Матчтан кейін Рыбакина бұл өзі үшін үлкен жетістік екенін, алайда қазір бар назары турнир мен алдағы кездесуде екенін айтты.
Турнирдің 2023 жылғы чемпионы Коко Гауфф та ширек финалда қарсыласын жеңіп, жартылай финалға жолдама алды.
2026 жылғы «Ролан Гаррос» чемпионы Мирра Андреева алғашқы сетті небәрі 26 минутта 6:2 есебімен жеңіп, матчты сәтті бастаған еді. Алайда Гауфф ойынды өз пайдасына бұрып, екінші сеттегі тай-брейкте екі матч-пойнтты қайтарды. Нәтижесінде ол 2:6, 7:6(7), 6:2 есебімен жеңіске жетті.
Осылайша турнирдің алғашқы төрт теннисшісі Соболенко, Рыбакина, Джессика Пегула және Гауфф жартылай финалға шықты.
Әлемдік рейтингтің үздік төрттігіндегі теннисшілердің барлығының АҚШ ашық чемпионатының жартылай финалына шығуы 1975 жылдан бері алғаш рет тіркеліп отыр.
Ерлер арасында бірінші нөмірлі Александр Зверев Ботик ван де Зандсхулпты 6:2, 7:5, 6:1 есебімен сенімді жеңді. Енді Зверев жартылай финалда Карен Хачановпен кездеседі. Хачановтың қарсыласы Александр Блокс 6:2, 7:5, 3:2 есебімен жеңіліп жатқан кезде жарақатына байланысты матчты жалғастыра алмай, жарыстан шығып қалды.
Жартылай финал кездесулері екі күнге жоспарланған. Бейсенбі күні әйелдер арасында Соболенко Пегуламен, ал Рыбакина Гауффпен кездеседі.
Ерлер арасында жұма күні Карлос Алькаразды бес сетте жеңген Бен Шелтон отандасы Фрэнсис Тиафомен кездеседі. Зверев болса Хачановпен сынға түседі.
Бұл жұптардың нәтижесінде 2006 жылдан бері алғаш рет америкалық теннисшінің финалға шығатыны анық болып отыр.
Әйелдер арасындағы финал 12 қыркүйек, сенбі күні АҚШ уақытымен сағат 16:00-де өтеді. Ал турнирді қорытындылайтын ерлер финалы 13 қыркүйек, жексенбі күні Артур Эш стадионында өтпек.
Жекелей сындағы чемпиондардың әрқайсысы 5,5 миллион доллар көлемінде жүлде алады. Турнирдің жалпы жүлде қоры 108 миллион долларды құрайды. Бұл өткен жылмен салыстырғанда 20 пайыз көп.
Осылайша «Grand Slam» турнирлері тарихында алғаш рет ойыншыларға төленетін жалпы жүлде қоры 100 миллион доллардан асты.
Финалда жеңілген теннисшілер 2,8 миллион доллардан алады. Ал жартылай финалға шыққан төрт ойыншы жарыстың нәтижесіне қарамастан әрқайсысы кемінде 1,45 миллион доллар табыс табады.
