Иранның Сыртқы істер министрі Аббас Аракчи АҚШ-тың еліне қарсы жасаған соңғы шабуыл толқынына жауап ретінде Вашингтонға: «Қауіп-қатерден аулақ болғыңыз келсе, өңірімізден кетіңіздер», – деді.
Аракчи “X” әлеуметтік желісіндегі жазбасында: «Соғыс алаңындағы жеңілістеріне қарамастан АҚШ біздің табандылығымызды сынауды таңдады. Қуатты Қарулы күштеріміз ешбір шабуыл мен қауіпті жауапсыз қалдырмайды», – деп жазды.
Иранның бірнеше аймағында жарылыс болды
Аракчи сондай-ақ: «Парсы шығанағының тарихында өңірге рұқсатсыз келген шетелдіктердің қайғылы тағдыры туралы көптеген мысал бар», – деп ескертті.
Бұған дейін Иран бұқаралық ақпарат құралдары Хормозган провинциясының оңтүстігіндегі Кешм аралында, Сирик, Минаб және Джаск қалаларында жарылыс болғанын және бұл аймақтарға снаряд пен зымырандардың түскенін хабарлаған болатын. Сондай-ақ Бендер-Аббас, Кешм және Сирик қалаларында әуе қорғаныс жүйелерінің іске қосылғаны айтылды.
АҚШ Орталық қолбасшылығы (CENTCOM) бұған дейін АҚШ армиясына тиесілі “Apache” тікұшағының атып түсірілуіне жауап ретінде америкалық күштердің Иранға қарсы әуе шабуылдарын бастағанын хабарлаған еді.
