АҚШ Президенті Дональд Трамп Жапонияның АҚШ-қа 550 миллиард доллар көлемінде инвестиция салатынын және екі ел арасында 15% мөлшерінде өзара кедендік тариф енгізілетінін мәлімдеді. Алайда жапондық ресми тұлғалар бұл мәлімдемелерді әлі растамады.
Дональд Трамп Жапониямен «алып» деп сипаттаған сауда келісімі туралы хабарлап, оның миллиардтаған доллар инвестиция әкелетінін және америкалық өнеркәсіп салаларын нығайтатынын айтты.
Трамп “Truth Social” платформасындағы жазбасында: «Біз Жапониямен керемет келісімге қол жеткіздік, бұл тарихта жасалған ең ірі келісім болуы мүмкін», — деп мәлімдеді.
АҚШ Президенті: «Жапония менің нұсқауыммен АҚШ-қа 550 миллиард доллар инвестиция салады, ал біз кірістің 90 пайызын аламыз», - деп мәлімдеді. Алайда бұл мәлімдемені растайтын ресми құжаттар немесе егжей-тегжейлі ақпарат ұсынылған жоқ.
Жапония Премьер-министрі Исиба Сигэру Трамп хабарлаған сауда келісімінің мазмұнын мұқият зерттеу қажет екенін айтып, түсініктеме беруден бас тартты.
Токио қаласында Трамптың Вашингтондағы мәлімдемесінен кейін журналистерге берген сұхбатында Исиба: «Келіссөздердің нәтижесіне қатысты пікір білдіру үшін алдымен келісім мәтінінің егжей-тегжейін мұқият талдауымыз қажет», - деді.
Трамп Жапонияның «автокөлік, жүк көлігі, күріш және басқа кейбір ауыл шаруашылығы өнімдері саудасына елін ашатынын» және АҚШ-қа 15% мөлшерінде өзара кедендік баж салығы төлейтінін мәлімдеді.
Бұл мәлімдеме Вашингтон мен Токио арасында әсіресе автокөлікке қатысты кедендік салықтар мен ұлттық қауіпсіздікке байланысты алымдар төңірегінде бірнеше ай бойы жалғасқан шиеленісті келіссөздерден кейін жасалды.
Бұған дейін Трамп Жапониядан келетін импорт өнімдеріне (соның ішінде автокөліктерге) 25%, ал болат пен алюминийге 50% кеден салығымен қорқытқан болатын. Алайда сейсенбі күнгі мәлімдемесінде ол бұл салалық салықтардың жаңа келісім аясында алынып тасталатынын нақты айтқан жоқ.
Трамп атап өткен 15%-дық кедендік салық мөлшері оның бұған дейінгі ескертулерінен төмен болғанымен, бұрынғы сауда келісімдеріндегі мөлшерлермен салыстырғанда айтарлықтай жоғары.
Ақ Үй журналистердің түсініктеме беру туралы өтініштеріне жауап бермеді, ал Жапония тарапы әлі ресми мәлімдеме жасаған жоқ.
