АҚШ президенті Дональд Трамп АҚШ-тың Иранда «ауқымды операция» бастағанын айтып, Америка тарапынан шығын болуы мүмкін екенін ескертті.

Трамп шабуылдардың мақсаты Иранның зымыран әлеуетін істен шығару және әскери-теңіз флотын жою екенін атап өтті. Бұл соққылар АҚШ пен Израильдің «егер Иран ядролық және баллистикалық зымыран бағдарламаларын жалғастыратын болса, қайтадан соққы беріледі» деген ескертулерінен кейін басталды.

Трамп “Truth Social” желісінде жариялаған бейнеүндеуінде «Мен бұл мәлімдемемді жеңіл қабылдамаңыз. Иран режимі адамдарды өлтіргісі келеді», — деді.

Сондай-ақ ол «Американың батыр қаһармандары қаза табуы мүмкін және соғыста жиі болатындай, біз шығынға ұшырауымыз ықтимал. Бірақ біз бұны бүгін үшін емес, болашақ үшін жасап жатырмыз және бұл маңызды миссия», — деп қосты.

Трамп Иран Қарулы күштері мен Ислам революциясының сақшылар корпусының мүшелерін қаруларын тастап, берілуге шақырды. Берілген жағдайда оларға тиіспеуге уәде берді. Трамптың айтуынша, бұдан басқа жалғыз таңдау — «сөзсіз өлім».

Вашингтон мен Тегеран соңғы апталарда Иранның ядролық мақсаттарына қатысты бірқатар келіссөздер жүргізген болатын. Тараптар арасындағы соңғы кездесу бейсенбі күні өтті, бірақ ешқандай келісімге қол жеткізілмеді.

Трамп: «Иран ондаған жыл бойы жасап келгеніндей, бұл жолы да бас тартты. Олар ядролық амбицияларынан бас тарту мүмкіндіктерінің бәрін кері итерді, енді біз бұған бұдан әрі төзе алмаймыз», — деп түйіндеді.