Ирак премьер-министрі Әли әз-Зейди мен АҚШ Мемлекеттік хатшысы Марко Рубио екі ел арасындағы экономикалық ынтымақтастық пен стратегиялық серіктестікті дамыту жолдарын талқылады.
Ирак премьер-министрі кеңсесінің мәлімдемесіне сәйкес, Зейди мен Рубио Біріккен Ұлттар Ұйымы (БҰҰ) Бас Ассамблеясының 81-сессиясына сапары аясында АҚШ-тың Нью-Йорк қаласында кездесті.
Кездесуде тараптар екі ел арасындағы экономикалық байланыстар мен стратегиялық ынтымақтастықты дамыту мәселелерін талқылады.
Премьер-министр Зейди Ирак пен АҚШ арасындағы қарым-қатынастарды нығайту және екі елдің стратегиялық серіктестігін жаңа деңгейге көтеру бағытында жұмыс істеп жатқанын растады.
Зейди сондай-ақ Ирак үкіметінің егемендікке қатысты міндеттерін орындауға және барлық қарудың конституциялық қағидаттарға сәйкес мемлекет билігінің бақылауында болуын қамтамасыз ету үшін қажетті шараларды жүзеге асыруға ниетті екенін растады.
Ал АҚШ Мемлекеттік хатшысы Рубио Ирак үкіметі мен халқына елдегі тұрақтылықты нығайту, Ирак халқының экономикалық әл-ауқат пен әлеммен ықпалдастыққа қатысты үміттерін жүзеге асыру бағытында қолдау көрсететінін тағы бір мәрте атап өтті.
Рубио сондай-ақ мемлекеттің негіздерін нығайтуға, тұрақтылық пен экономикалық дамуды одан әрі ілгерілетуге бағытталған үкімет шараларын қолдайтынын білдірді.
Зейди бұған дейінгі мәлімдемесінде АҚШ бастаған коалиция күштерінің барлығы 30 қыркүйекке дейін Ирактан шығарылатынын айтқан еді. Ирак премьер-министрі үкіметінің қаруды мемлекет бақылауына шоғырландыру мәселесі бойынша қарулы топтармен диалогты жалғастырып жатқанын және бұл мәселеде райынан қайтпайтынын мәлімдеген болатын.
