Израильдің Сомалилендті тану қадамын айыптау мақсатында жасалған соңғы мәлімдемеде хоуситтердің лидері Израильдің Сомалилендтегі кез келген әрекеті «әскери нысана» ретінде қабылданатынын ескертті.

Топ жетекшісі Абдул-Мәлік әл-Хуси жексенбі күні жариялаған мәлімдемесінде «Біз Сомалилендтегі кез келген Израиль әрекетін қарулы күштеріміз үшін әскери нысана деп санаймыз, өйткені бұл Сомали мен Йеменге жасалған шабуыл және аймақ қауіпсіздігіне төнген қатер», — деп атап өтті.

Израиль әлемде Сомалилендті егемен мемлекет ретінде таныған бірінші ел болса, бұл шешім Түркиямен бірге Африка және Таяу Шығыс елдері бастаған бірқатар мемлекеттер тарапынан айыпталды.

1991 жылы Сомалиден тәуелсіздігін жариялағаннан бері ресми түрде танылмаған Сомалиленд орталық үкіметтің аймаққа бақылау орната алмауы және лидерлерінің халықаралық деңгейде танылуға қол жеткізе алмауына байланысты іс жүзінде дербес әкімшілік, саяси және қауіпсіздік бірлігі ретінде қызмет етіп келеді. Сомали үкіметі Сомалилендті тәуелсіз мемлекет ретінде танымайды, аймақты өз аумағының ажырамас бөлігі деп санайды және Сомалилендпен жасалатын кез келген тікелей келісім немесе байланысты елдің егемендігі мен тұтастығына қайшы деп бағалайды.

Хоусит содырлар Израильдің Газадағы геноциді кезінде палестиналықтарға қарсы қырғынды тоқтатуға мәжбүрлеу мақсатында теңіз тасымалы мен Израильге жасаған шабуылдары арқылы халықаралық деңгейде танымал болды. 10 қазанда басталған Газадағы атысты тоқтату бітімінен бері топ ешқандай шабуыл үшін жауапкершілікті өз мойнына алған жоқ.