Индонезияның Метеорология, климатология және геофизика агенттігі Суматрада болған қатты су тасқыны мен көшкіндерден қаза тапқандар саны артып жатқан тұста жауын-шашынның жалғасатынын болжады.
«Kompas TV» дүйсенбі күні елдің бірнеше аймағында жаңбырдың күшейетінін ескерткен болатын.
Елдің Ұлттық апаттарды басқару агенттігі жексенбі күнгі мәлімдемесінде Суматрада жалғасып жатқан су тасқыны мен көшкін салдарынан қаза тапқандар саны 442-ге жеткенін, 402 адамның жоғалып кеткенін хабарлады.
Агенттік зардап шеккен аймақтарда іздестіру-құтқару топтары алты күннен бері жоғалған адамдарды табу үшін жұмысын жалғастырып жатқанын айтты.
Мәліметтерге сәйкес, 646 адам жараланған, 1,1 миллионнан астам адам зардап шеккен, жүздеген үй зақымданған және су тасқыны салдарынан 290 мыңнан астам адам эвакуацияланған. Зардап шеккен көптеген аймаққа жету әлі де мүмкін болмай отыр. Іздеу топтары жоғалғандарды құрлық және әуе жолдары арқылы іздестіруде, алайда қолайсыз жолдар мен ауа-райы ауыр техниканың тиімді қолданылуына кедергі келтіріп отыр.
