Демократтар президент Трампты айыптады

АҚШ пен Израильдің Иранға қарсы соғысы төртінші аптасына аяқ басқан шақта демократ сенатор Крис Ван Холлен АҚШ президенті Дональд Трампты Тегеранмен келіссөз жүргізілгені туралы өтірік айтты деп айыптады.

“CNN” арнасына берген сұхбатында Ван Холлен Трамптың Иран келіссөздерге қатысып жатыр және қақтығысты тоқтату үшін АҚШ-тың барлық талапты қабылдауға дайын деген мәлімдемелерді жалған деп атады.

Сенатор: «Өкінішке қарай, Дональд Трамптың басынан бері америкалықтарға өтірік айтқанын және әлі де өтірік айтып келе жатқанын ұқтық», — деді.

Трамп сөз еткен даулы «келіссөздер» соғысты тоқтатуға бағытталған құпия байланыстарға қатысты болды. Олардың ішінде Иранның уран байытуды тоқтатуы, байытылған уран қорларын жоюы және Ормуз бұғазын халықаралық мұнай тасымалы үшін қайта ашуы жөніндегі талап бар еді.

Ван Холлен сондай-ақ АҚШ-тың Иранның энергетикалық инфрақұрылымына жасауы мүмкін кез келген шабуылы, соның ішінде Иранның негізгі мұнай экспорт терминалы саналатын Харг аралын нысанаға алу жоспарлары да, бәлкім, «соғыс қылмысы» болып саналуы мүмкін екенін ескертті.

Трамп дүйсенбі күні “Truth Social” желісінде жариялаған жазбасында Иранмен келіссөздер «өте жақсы» әрі «тиімді» жүріп жатқанын айтып, Иранның электр станцияларына және энергетикалық инфрақұрылымына шабуылдарға бес күндік үзіліс жарияланғанын хабарлаған болатын.

Иран Ислам кеңесі мәжілісінің төрағасы Мұхаммад Багер Галибаф та, Сыртқы істер министрлігінің өкілі Исмаил Багаеи де Трамптың мәлімдемелерін қабылдамай, тікелей де, жанама да ешқандай келіссөз болмағанын айтқан болатын.