Біріккен Араб Әмірліктері ұлттық мұнай компаниясы «ADNOC»-қа тиесілі екі танкердің Ормуз бұғазы арқылы өтіп бара жатқанда нысанаға алынғанын хабарлады.
БАӘ-нің «WAM» ресми ақпарат агенттігінің мәліметінше, оқиға салдарынан қаза тапқандар мен жараланғандар жоқ.
БАӘ Сыртқы істер министрлігі мәлімдеме жасап, шабуылды айыптады. Мәлімдемеде бұл әрекет теңіз қатынасының еркіндігін қолдайтын, сауда кемелерін нысанаға алуға және халықаралық теңіз жолдарының жұмысына кедергі келтіруге жол бермейтін БҰҰ Қауіпсіздік Кеңесінің №2817 қарарын ашық бұзу екені айтылды.
Сондай-ақ коммерциялық теңіз тасымалына шабуыл жасау және Ормуз бұғазын қысым көрсету немесе бопсалау құралы ретінде пайдалану өңірлік тұрақтылыққа, халықтардың қауіпсіздігіне және жаһандық энергетикалық қауіпсіздікке тікелей қатер төндіретіні атап өтілді.
БАӘ Иранды мұндай шабуыл әрекеттерін тоқтатуға шақырып, Ормуз бұғазының толық ашылуы қажет екенін мәлімдеді.
