Мемлекеттік “CCTV” телеарнасының хабарлауынша, Қытай Халық Республикасының Төрағасы Си Цзиньпин бейсенбі күні жасаған мәлімдемесінде Еуропалық Одақтың «дұрыс стратегиялық таңдау жасауы» қажет екенін айтып, жаһандық белгісіздік жағдайында ЕО басшыларын «сенім мен өзара байланысты нығайтуға» шақырды.

Пекиндегі Халық Ұлы Жиналысы сарайында басталған 25-ші Қытай–ЕО саммитінің ашылуында сөйлеген сөзінде Си Цзиньпин Қытай мен Еуропа лидерлері халықтың үмітін ақтауы керек екенін атап өтті.

Қытай басшысы Си Цзиньпин Премьер-министр Ли Цянмен бірге Еуропа Комиссиясының төрайымы Урсула фон дер Ляйен және Еуропалық Кеңестің төрағасы Антониу Коштамен кездесті.

Си фон дер Ляйен мен Коштаға: «Халықаралық жағдай қаншалықты күрделі әрі қиын болса, Қытай мен Еуропалық Одақ арасындағы байланыс соншалықты нығаюы тиіс; өзара сенім артып, ынтымақтастық тереңдеуі керек», - деді.

«Өзара тиімді ынтымақтастық»

Күн тәртібінде сауда теңсіздігі, нарыққа қолжетімділік және сирек кездесетін жер элементтері секілді мәселелер де бар.

Еуропа Комиссиясының төрайымы Урсула фон дер Ляйен бұл саммитті «қатынастарымызды әрі қарай ілгерілетуге және қайта теңестіруге мүмкіндік» деп бағалады.

Саммитке аз уақыт қалғанда фон дер Ляйен “X” желісіндегі парақшасында: «Өзара тиімді ынтымақтастықтың мүмкін екеніне сенемін», - деп жазды.

Бұл саммит Қытай мен Еуропалық Одақ арасындағы дипломатиялық қатынастардың 50 жылдығына орай ұйымдастырылып отыр. Қытай мен ЕО арасындағы жылдық сауда көлемі 860 миллиард доллардан асады.