АҚШ Қарулы күштерінің Орталық қолбасшылығы («CENTCOM») лаңкестердің күзетілетін қамау орындарында қалуын қамтамасыз ету мақсатында Сирияның солтүстік-шығысындағы ДАИШ тұтқындарын Иракқа көшіру жөніндегі миссияны бастағанын хабарлады.
Сәрсенбі күні жасалған мәлімдемеде миссияның АҚШ күштері Хасеке уәлаятының солтүстік-шығысындағы қамау орталығында отырған 150 ДАИШ лаңкесін Ирактағы қауіпсіз орынға сәтті жеткізгеннен кейін басталғаны айтылды. Мәлімдемеде «Сириядан Ирактың бақылауындағы нысандарға 7 мыңға жуық ДАИШ тұтқыны көшірілуі мүмкін», - делінді.
«CENTCOM» қолбасшысы адмирал Брэд Купер АҚШ-тың Иракпен қатар өңірлік серіктестермен тығыз жұмыс істеп жатқанын және олардың ДАИШ-ты түбегейлі жеңіліске ұшыратудағы рөлін жоғары бағалайтынын айтты. Купердің сөзінше, ДАИШ тұтқындарын тәртіппен, әрі қауіпсіз түрде көшіруге жағдай жасау – қашып кету қаупінің алдын алу тұрғысынан да, АҚШ пен өңір қауіпсіздігі үшін қауіпті болдырмау үшін де өте маңызды.
Бірнеше күн бұрын АҚШ-тың Түркиядағы елшісі Том Баррак Вашингтонның Сириядағы басымдықтары енді келісімді қолдау, ұлттық бірлік пен тұрақтылықты ілгерілетуге бағытталғанын мәлімдеген болатын. Баррак АҚШ-тың бөлінуді қолдамайтынын айтып, «Вашингтон бөлінуді немесе федерализмді мақұлдамайды, келісімді қолдау және ұлттық бірлікті ілгерілетуді қалайды», - деді.
