Түркия Республикасының Мәдениет және туризм министрі Мехмет Нури Эрсой Эгей теңізінің Термаик шығанағындағы грек порты Салоники қаласында қалпына келтірілген Ататүрік үйінің ашылу рәсіміне қатысты. Ашылу салтанатында ол Ататүрікке құрмет көрсету ˗ Республиканы және оның құндылықтарын сақтаумен қатар еліміз бен өскелең ұрпақ алдындағы жауапкершілік екенін атап өтті.
Жексенбі күні Эрсой Түркия Республикасының негізін қалаушы Мұстафа Кемал Ататүрікке құрмет пен ризашылығын білдірді.
Министр Ататүріктің тек мемлекет қайраткері ғана емес, ұлттың жүрегінде өшпес із қалдырған ұлы тұлға екенін айтты. Мұражайдың қайта ашылуы - оның есіміне деген құрмет пен адалдықтың көрінісі екенін жеткізді.
Сондай-ақ президент Режеп Тайып Ердоғанның жетекшілігімен Түркияның демократияға, тәуелсіздікке, еркіндікке және республикаға деген адалдығын атап өтті. Ататүріктің туған үйі ˗ жай ғана ғимарат емес, республика құрылуының алғашқы қадамдары басталған қасиетті орын екенін айтты.
Мәдени мұраны сақтау
Эрсой министрлік 2022 жылы кең көлемді қалпына келтіру және техникалық безендіру жұмыстарын жүргізгенін және 2024 жылдың 19 желтоқсанында басталған осы үдерісті жеке бақылағанын айтты.
1953 жылғы музей келбетіне сай қайта қалпына келтірілген Ататүрік үйінде жаңартылған бөлмелер, этнографиялық көрме, кітапхана және Ататүріктің өмір тарихын баяндайтын қабаттар бар.
Түркияның мәдени мұраны сақтау жөніндегі табандылығын атап өткен Эрсой Салоникидегі Ататүрік үйі осы күш-жігердің айқын үлгісі екенін айтты және президент Режеп Тайып Ердоғанның бұл үйдің Түркия мен Грекия арасындағы бейбітшілік пен өзара түсіністіктің символы болуы керек деген үндеуін еске салды.
Грекияның Туризм жөніндегі вице-министрі Анна Караманли да Ататүрік үйінің қайта ашылуы екі ел арасындағы қатынастарды нығайтып, көршілік байланыстарын дамытуға мүмкіндік беретін маңызды оқиға екенін атап өтті.
