Данияның мемлекеттік пошта кәсіпорны “PostNord” сейсенбі күні соңғы хатты жеткізіп, елдегі 401 жылдық қоғамдық пошта тарату дәстүрін тоқтатты.

Данияның “DR” хабар тарату мекемесінің мәліметінше, “PostNord” бұдан былай тек сәлемдемелерді (карго) жеткізуге ғана назар аударады.

Компания цифрландыру мен өзгерген байланыс әдеттеріне байланысты хат көлемінің айтарлықтай азайғанын негізге алды. “PostNord” бас директоры Ким Педерсен: «Бүгін — “PostNord” тарихындағы бетбұрыс кезең. Біз ғасырлар бойы жалғасқан хат тасу қызметін аяқтаймыз, бірақ даниялықтар бізге ең көп мұқтаж болып отырған сала — электронды коммерцияда жаңа парақ ашамыз; мұнда қазір сәлемдемелер хаттардан әлдеқайда көп», — деді. Бұл қадам физикалық поштаға деген сұранысты айтарлықтай азайтқан мобильді төлемдер сияқты цифрлық шешімдерге бағытталған әлеуметтік өзгерісті көрсетеді.

“ PostNord” бұл қызметтен кеткеннен кейін “Dao” атты жекеменшік компания хат тасу жұмыстарының басым бөлігін өз міндетіне алады. Компанияның бас директоры Ханс Питер Ниссен 2026 жылы шамамен 80 миллион хат тарататынын болжап отыр.