АҚШ Иранмен қақтығысқа қолдау білдірмеген бірқатар НАТО елінен әскери күштерін әкетпек
АҚШ-тың бұқаралық ақпарат құралдарының мәліметінше, Трамп әкімшілігі Иранмен соғыс кезінде ынтымақтастық танытпаған кейбір НАТО елдерінен өз армиясын шығаруды, ал операциялық қолдау көрсеткен елдерде АҚШ күштерін арттыруды қарастыруда.
«ABC News арнасының хабарлауынша, Трамп әкімшілігі Иранмен соғыс барысында көмек көрсетпеген кейбір НАТО одақтастарынан АҚШ әскерін шығаруды жоспарлауда.
Бейсенбі күні жарияланған ақпаратқа сәйкес, АҚШ әкімшілігінің бір өкілі Иранмен соңғы қақтығыстар кезінде операцияларға қолдау көрсетуге баяу немесе құлықсыз болған кейбір НАТО елдеріндегі АҚШ күштерін қысқарту немесе қайта орналастыру жоспарлары қаралып жатқанын айтты.
Өкілдің сөзінше, бұл қадам соғыс кезінде аз қолдау көрсеткен елдерден АҚШ күштерін көбірек көмек берген мемлекеттерге ауыстыруды қамтуы мүмкін. Алайда бұл талқылаулардың қаншалықты ілгерілегені және жоспар жүзеге асса, қай елдерге әсер ететіні әзірге белгісіз.
Бұл бастама АҚШ-тың жоғары лауазымды тұлғаларының соғыс кезінде Еуропадағы ортақ әскери базаларды пайдалану шектеулеріне қатысты сын-пікірлерінен кейін көтерілді. АҚШ Мемлекеттік хатшысы Марко Рубио егер одақтас елдердегі базаларға операциялық қолжетімділік шектелсе, онда бұл елдерде АҚШ күштерін орналастырудың мәні жоқ екенін айтты.
НАТО Бас хатшысы Марк Рютте де одақтастардың қолдау мәселесін көтеріп, кейбір елдердің бастапқыда баяу әрекет еткенін мойындады. Алайда ол еуропалық одақтастардың кейіннен АҚШ операцияларына маңызды үлес қосқанын атап өтті.
Рютте сондай-ақ НАТО-ның стратегиялық маңызын атап өтіп, одақтың тек Еуропа қауіпсіздігі үшін ғана емес, АҚШ-ты қорғау үшін де қажет екенін айтты.
«НАТО әрине еуропалықтарды қорғау үшін құрылған, бірақ ол сондай-ақ Америка Құрама Штаттарын да қорғайды», – деді ол.
АҚШ президенті Дональд Трамп НАТО-ның Иран соғысына қатысты әрекетіне бірнеше рет көңілі толмайтынын жеткізген. Трамп сәрсенбі күні Марк Рюттемен кездескеннен кейін «Truth Social» желісінде «НАТО қажет кезде жанымыздан табылмады және кейін де жанымыздан табылмайды», – деп жазды.
Ақ Үйдің баспасөз хатшысы Каролин Ливитт бұған дейін Трамптың НАТО-ны бұл соғыста «сынақтан өтіп, сәтсіздікке ұшырады» деп бағалағанын айтқан.
Ливитт: «Соңғы алты апта ішінде НАТО-ның америкалықтарға теріс айналғаны өте өкінішті, өйткені америкалықтар олардың қорғанысын қаржыландырып отыр», – деді.