Мемлекеттік БАҚ байланыс жерсерігін алып бара жатқан Қытай зымыранын ұшыру сәтсіз аяқталғанын хабарлады. Ресми органдар сәтсіздікті «ұшу кезіндегі ауытқумен» байланыстырды.
“Xinhua” мемлекеттік ақпарат агенттігінің хабарлауынша, дүйсенбі күні Қытайдың оңтүстігіндегі Хайнань провинциясының Вэньчан ғарыш айлағынан жергілікті уақытпен сағат 20:02-де (GMT 12:02) ұшырылған “Long March 7A” зымыран тасығышының ұшырылымы сәтсіз аяқталды.
“Xinhua” “Zhongxing-4B” байланыс жерсерігін алып бара жатқан зымыранның ұшуы кезінде “ауытқу” болғанын хабарлап, акаудың себебі анықталып жатқанын мәлімдеді.
Сингапурда орналасқан “Channel News Asia” телеарнасы “Instagram”-дағы жазбасында зымыранның жарылғанын хабарлап, оқиға орнында аспандағы отты шарды таңдана бақылап тұрған адамдардың видеосын жариялады.
“Күрделі” жұмыс
Қытай ғарыш агенттігінің мәліметінше, ел шілде айында алғаш рет қайта пайдалануға болатын зымыранды сәтті қондырды. Бұл жетістік Қытайдың ғарыш саласындағы мақсаттары мен ұшыру шығындарын азайту тұрғысынан маңызды қадам болды.
Қытай Америка Құрама Штаттары “Artemis” бағдарламасымен бәсекеде 2030 жылға дейін Айға ғарышкерлерді қондыруды көздеп отыр.
“SpaceX” компаниясының бас директоры Илон Маск “X” желісінде дүйсенбі күнгі сәтсіз ұшыру туралы жазбаға пікір білдіріп, «Зымыран өндірісі – өте күрделі жұмыс. Олар тез арада қалыпқа келеді деп үміттенемін», – деді.
Синьхуа 2020 жылдың наурызында Қытайдың сол жылы Вэньчан ғарыш айлағынан алғаш рет ұшырған “Long March 7A” зымыраны да “ақауға” байланысты сәтсіздікке ұшырағанын хабарлаған еді.
