Иран бойынша жұмыс істейтін адам құқықтарын қорғау ұйымы сәрсенбі күні Ирандағы наразылық акцияларында қаза тапқандар санының 38-ге дейін өскенін хабарлады.

АҚШ-та орналасқан ұйымның интернет сайтында жарияланған есепте шерулердің бүкіл ел аумағында 11 күннен бері жалғасып жатқаны айтылған.

Есепте наразылық шараларының барлық 31 уәлаятта ұйымдастырылғаны, салдарынан 34 наразылық білдіруші мен төрт қауіпсіздік қызметкерінің қаза тапқаны көрсетілген.

348 түрлі жерде өткен шерулерде ондаған адам жараланып, 2 217 адам қамауға алынды. Мәліметтерге сәйкес, жарақаттардың көбі бытыра және пластик оқтардан болған.

Билік өкілдері қаза тапқандар мен жараланғандар туралы ешқандай ресми мәлімдеме жасаған жоқ.

АҚШ президенті Дональд Трамп жұма күні Тегеран шерушілерге қарсы өлімге әкелетін күш қолданатын болса, Вашингтонның наразылық білдірушілерге «көмекке келетінін» айтты. Бұл мәлімдеме Иранның жоғары лауазымды тұлғаларының ашуын туғызды.

Иран соңғы апталарда экономиканың нашарлауы және риал бағамының долларға шаққанда 1 350 000-нан асып, күрт құнсыздануына байланысты ауқымды наразылықтарға тап болды.