Медиа хабарларына сәйкес, дүйсенбі күні Ливанның оңтүстігінде көлікке жасалған Израиль шабуылы салдарынан бір адам қаза тауып, бірнеше адам жараланды.
Ресми «NNA» ақпарат агенттігінің хабарлауынша, Израильге тиесілі ұшқышсыз ұшақ Сайда ауданына қарасты Байсария қалашығының маңында бір көлікті нысанаға алған. Агенттік қаза тапқан адамның кім екені мен жараланғандардың нақты саны туралы қосымша мәлімет берген жоқ. Сонымен қатар агенттік Израильдің ұшқышсыз ұшақтары Иклим әл-Туффах өңірі үстінде орта биіктікте ұшып жүргенін хабарлады.
Израиль армиясы бұл ақпараттарға байланысты әзірге ешқандай түсініктеме берген жоқ.
Жексенбі күнгі Израиль шабуылдарында тағы екі адам қаза тапқан болатын. Израиль армиясы соңғы апталарда Хезболла мүшелері мен олардың инфрақұрылымдарын нысанаға алып, Ливан аумағына әуе соққыларын күшейткенін мәлімдеді. 2023 жылдың қазанында басталып, 2024 жылдың қыркүйегінде  шабуылға ұласқан Израильдің Ливанға бағытталған операциялары кезінде 4 000-нан астам адам қаза тауып, шамамен 17 000 адам жараланған.