“ WhatsApp” Ресейді өз шекарасы аясында платформа қызметтерін бұғаттауға тырысып жатыр деп айыптап, бұл қадамның пайдаланушылардың қауіпсіз, шифрланған байланыс құқығына нұқсан келтіруді көздейтінін мәлімдеді.
Meta компаниясына тиесілі мессенджер бейсенбі күні жасаған мәлімдемесінде «үкіметтің адамдардың қауіпсіз байланыс құқығын бұзу әрекеттеріне қарсы екенін» және Ресей билігі осы себепті 100 миллионнан астам пайдаланушының қолжетімділігін шектеуге тырысып жатқанын атап өтті.
Компания «WhatsApp” хат алмасулары толықтай шифрланған. Ресейді қоса алғанда, бүкіл әлемде адамдарға толық шифрланған байланыс ұсыну үшін қолымыздан келгеннің бәрін жасауды жалғастырамыз», — деп мәлімдеді.
Ресейдің мессенджерлерге қойған шектеулері
Бұл мәлімдемелер Ресейдің реттеуші органдары “WhatsApp” пен “Telegram-дағы” белгілі қоңырауларды шектей бастаған және шетелдік платформаларды алаяқтық пен терроризмді тергеу кезінде құқық қорғау органдарымен ақпарат бөліспейді деп айыптаған тұста жасалды.
“Telegram” платформаның ашық арналарын жасанды интеллект құралдарын қолдана отырып белсенді түрде қадағалайтынын, «күн сайын миллиондаған зиянды хабарламаларды» өшіретінін және диверсия, зорлық-зомбылық пен алаяқтыққа шақырулармен күресетінін жеткізді.
Ресей деректерді сақтау және мазмұнды бақылау мәселелері бойынша шетелдік технологиялық компаниялармен ұзақ уақыттан бері күресіп келеді. Бұл текетірес Мәскеудің 2022 жылғы ақпанда Украинаға қарсы әскери шабуылы басталғаннан кейін күрт шиеленісе түсті.
Сыншылардың айтуынша, Кремль содан бері елдің интернет кеңістігін бақылауға алу және тәуелсіз немесе шетелдік платформаларға қолжетімділікті шектеу процестерін үдеткен.
Соңғы шектеулер Мәскеу мен Кремний алқабы арасындағы тереңдеп бара жатқан цифрлық алшақтықты көрсетеді, енді шифрланған хабарлама алмасу осы күрестің орталығына айналды.
