БҰҰ Қауіпсіздік Кеңесі Сирия президенті Ахмед әл-Шара мен Ішкі істер министрі Анас Хаттабты ДАИШ пен Әл-Каида санкциялар тізімінен шығару туралы қарар жобасын қабылдады.
АҚШ әзірлеген бұл қарар 14 дауыс жинап, Қытайдың қалыс қалуымен қабылданды.
АҚШ-тың БҰҰ-дағы өкілі Майк Уолтц бұл шешімді құптады.
«Бұл мәтіннің қабылдануымен Кеңес Сирияның жаңа дәуірге аяқ басқанын мойындайтын күшті саяси белгі жіберіп отыр», – деді ол.
Уолтц «Президент әл-Шара мен Ішкі істер министрі Хаттабты тізімнен шығару сириялық халыққа үлкен мүмкіндік береді» деді.
Қытайдың өкілі Фу Цун бұл қарардың «барлық тараптардың заңды мүдделерін ескермегенін» айтты.
«Қарарды ұсынушы барлық мүшелердің пікірін толық ескермей, Кеңесті үлкен келіспеушіліктерге қарамастан әрекет етуге мәжбүрледі. Бұл өз саяси мүдделерін алға тарту әрекеті», – деді Фу АҚШ-ты меңзеп.
«Қытай халықаралық қауымдастықпен бірге Сирияда қауіпсіздік, тұрақтылық және дамуды ертерек қамтамасыз ету үшін конструктивті рөл атқаруға дайын», – деп қосты ол.
Ресейдің БҰҰ-дағы өкілі Василий Небензя бұл қарардың «Сирия Араб Республикасының егемендігі, тәуелсіздігі, бірлігі және аумақтық тұтастығын сақтау жөніндегі Қауіпсіздік Кеңесінің міндеттемелерін қайта растайтынын» атап өтті.
«Біз бұл негізгі қағидаттарды халықаралық қауымдастықтың барлық мүшелері, соның ішінде өз ережелерімен әрекет етіп, Сирияның егемен аумағының бір бөлігін, соның ішінде Голан биіктіктерін басып алған Израиль де сақтайды деп күтеміз», – деді ол.
Дамаск бұл шешімді құптады
Сирия президент әл-Шара мен Ішкі істер министрі Хаттабты санкциялар тізімінен шығару туралы БҰҰ Қауіпсіздік Кеңесінің шешімін құптап, оны Дамасктің дипломатиялық заңдылығының артып келе жатқанының дәлелі деп атады.
“X” әлеуметтік желісінде жарияланған мәлімдемеде Сыртқы істер министрі Асад әл-Шайбани: «Сириялық дипломатия өзінің белсенділігін және ашық әрі тұрақты болашаққа жол ашу қабілетін тағы бір рет дәлелдеді», – деді.
Сирия АҚШ пен достас елдерге Сирия мен оның халқына қолдау көрсеткені үшін алғысын білдірді.
