Ресей Қорғаныс министрлігі Украинаның Одесса портындағы жанармай қоймалары мен әскери жүк тасымалдаған құрғақ жүк кемесіне соққы жасалғанын мәлімдеді.
Министрлік таратқан мәлімдемеде Ресей Қарулы күштерінің кеше кешке Украинаның порт инфрақұрылымы мен Украина армиясының теңіз көліктеріне шабуылдарын жалғастырғаны айтылды.
Шабуыл кезінде әуеден ұшырылатын жоғары дәлдіктегі қарулар мен дрон қолданылған. Соның нәтижесінде Одесса портындағы Украина армиясына арналған жанармай қоймалары нысанаға алынған.
Сонымен қатар Одессаның оңтүстігінде Украина порттарының біріне әскери жүк тасымалдаған құрғақ жүк кемесіне соққы жасалғаны хабарланды.
Министрліктің тағы бір мәлімдемесінде түн ішінде Украинаға тиесілі ұшақ үлгісіндегі 371 дронның әуе қорғанысы күштері тарапынан жойылғаны айтылды.
Дрондар Белгород, Брянск, Воронеж, Волгоград, Курск, Ростов, Тула және Краснодар өңірлерінде, Дағыстан мен Татарстан республикаларында, сондай-ақ Қырым түбегі, Азов және Қаратеңіз үстінде залалсыздандырылған.
