Энергетика және табиғи ресурстар министрі Алпарслан Байрактар Қытаймен шамамен 15 миллиард долларлық инвестицияны көздейтін ынтымақтастық аясында жалпы қуаты 7 мың мегаватт болатын күн және жел электр станцияларын, жаңа энергия сақтау жүйелерін және қуаты 4 мың мегаватт электр энергиясын тасымалдау инфрақұрылымын жүзеге асыруды көздеп отырғандарын мәлімдеді.

Байрактар «X» әлеуметтік желісіндегі парақшасында Біріккен Ұлттар Ұйымының Климаттың өзгеруі туралы негіздемелік конвенциясы Тараптарының 31-ші конференциясы (COP31) шеңберінде Қытай Халық Республикасының Ұлттық энергетика басқармасымен қол қойылған өзара түсіністік меморандумына қатысты жазба жариялады.

Министр Байрактар өз жазбасында: «COP31 саммитінде Қытай Халық Республикасының Ұлттық энергетика басқармасымен «Жаңартылатын энергия саласындағы ынтымақтастық туралы өзара түсіністік меморандумына» қол қойылды. Елімізге шамамен 15 миллиард долларлық ауқымды инвестиция тартуды көздейтін бұл келісім арқылы жалпы қуаты 7 мың мегаватт болатын күн және жел электр станцияларын, жаңа энергия сақтау жүйелерін және қуаты 4 мың мегаватт электр тасымалдау инфрақұрылымын іске қосуды мақсат етіп отырмыз», – деді.

Аталған ынтымақтастықтың жаңартылатын энергия қуатын арттырумен қатар, технологиялар трансферіне де септігін тигізетінін атап өткен Байрактар  «Бұл ынтымақтастық жаңартылатын энергия қуатымызды арттырып қана қоймай, сонымен бірге технологиялар трансферін қамтамасыз ету арқылы жел турбиналары жабдықтарының елімізде өндірілуіне және отандық өнеркәсібіміздің дамуына  зор үлес қосады. «Ұлттық энергетика — 2040» пайымымызға сәйкес, энергиямен жабдықтау қауіпсіздігімізді нығайтатын және жасыл трансформациямызды жеделдететін осы тарихи құжаттың елдеріміз үшін қайырлы болуын тілеймін» деді.