Түркия билігі Түркия Республикасының президенті Режеп Тайып Ердоған мен Америка Құрама Штаттарының президенті Дональд Трамптың екіжақты қарым-қатынастарды, аймақтық және жаһандық мәселелерді талқылау үшін телефон арқылы сөйлескенін мәлімдеді.

Түркия Президенттік аппарат жанындағы Коммуникация басқармасының хабарлауынша, екі ел лидері Түркия мен АҚШ арасындағы екіжақты саяси қатынастарды, қорғаныс өнеркәсібі саласындағы ынтымақтастықты, екі ел арасындағы сауда айналымының мақсатты деңгейіне жету үшін басылатын қадамдарды, сондай-ақ Газа мен Венесуэланы қоса алғанда, аймақтық және жаһандық тақырыптарды талқылады.

Ердоған бұған дейін жасаған мәлімдемесінде, келіссөз барысында Анкараның Венесуэлаға қатысты алаңдаушылықтарын жеткізгенін айтқан болатын.

Министрлер кабинетінің отырысынан кейін Ердоған: «АҚШ президенті Трамппен телефон әңгімесінде Түркияның маңызды мәселелерін оған жеткіздік. Венесуэланың тұрақсыздыққа ұрынбауы керектігін ерекше атап өттік», — деді.

Президент Ердоған Түркияның Венесуэла халқына қолдау көрсетуді жалғастыратынын да тілге тиек етті. «Түркия мен түрік халқы гүлдену, бейбітшілік пен даму жолындағы дос Венесуэла халқының жанында болуды жалғастырады», — деді ол.

Ақ Үй тарапынан бұл телефон әңгімесінің егжей-тегжейіне қатысты әзірге ешқандай ресми мәлімдеме жасалған жоқ.