БҰҰ миссиясы Ливанның оңтүстігіндегі Адчит әл-Кусайр ауылының маңындағы “UNIFIL” бекетінде оқ-дәрінің жарылуы салдарынан БҰҰ-ның бір бітімгер қызметкері қаза тауып, тағы біреуінің ауыр жараланғанын мәлімдеді.
“UNIFIL” жасаған мәлімдемесінде «Біз оқ-дәрінің қайдан келгенін білмейміз. Оқиғаның барлық мән-жайын анықтау үшін тергеу бастадық», — деп атап өтті.
“UNIFIL” Израильмен арадағы бөлу сызығы бойындағы қақтығыстарды бақылау үшін Израиль сарбаздары мен Хезболла жауынгерлері арасындағы қақтығыстардың ошағы болып табылатын Ливанның оңтүстігінде орналасқан. 2026 жылы аяқталуы жоспарланған бұл миссия соңғы жылдары әрі Израильмен, әрі Хезболламен арадағы оқиғалардың ортасында қалды.
6 наурызда Гана қарулы күштері Ливандағы БҰҰ бітімгершілік батальонының штаб-пәтері зымырандық шабуылға ұшырап, екі сарбаздың ауыр жараланғанын жариялады. Израиль армиясы да сол күні танк оғының БҰҰ бекетіне тиіп, ганалық бітімгерлерді жаралағанын мойындады, бірақ өз бөлімшелерінің екі сарбазының жеңіл жаралануына себеп болған Хезболланың танкіге қарсы зымыран оғына жауап бергенін алға тартты.
“UNIFIL” «Біз тағы да барлық тарапты халықаралық құқықтан туындайтын міндеттемелерін орындауға және БҰҰ қызметкерлері мен мүліктерінің қауіпсіздігі мен қорғалуын әрдайым қамтамасыз етуге шақырамыз», — деп мәлімдеме жасады.
