Түркия Республикасы мен Ұлыбритания екіжақты қатынастарды одан әрі ілгерілету және тығыз диалог арқылы ынтымақтастықты кеңейту үшін жаңа негіз қалыптастыратын “Стратегиялық серіктестік негіздемелік құжатына” қол қойды.
Түркия Сыртқы істер министрлігінің бейсенбі күні “X” платформасында жариялаған мәлімдемесіне сәйкес, құжат Сыртқы істер министрі Хакан Фидан мен Ұлыбритания Сыртқы істер министрі Иветт Купердің Лондондағы кездесуінде қол қойылды.
Министрліктің ресми сайтында жарияланған бірлескен мәлімдемеде Негіздемелік құжаттың қауіпсіздіктен климаттың өзгеруіне, гуманитарлық дамудан ғылым мен технологияға дейінгі кең саланы қамтитыны айтылды.
Құжат екі НАТО одақтасы арасындағы қазіргі стратегиялық серіктестікті одан әрі нығайтуды және екіжақты әрі көпжақты деңгейлерде тығыз диалог арқылы дамытылатын ынтымақтастық аясын кеңейтуді мақсат етеді.
НАТО мен жаһандық қауіпсіздікке назар аударылды
Мәлімдемеде аталған негіздеменің “Таяу Шығыста қауіпсіздік пен тұрақтылық орнатуға деген берік ұмтылыспен қатар көптеген халықаралық мәселе мен жаһандық сын-қатер бойынша ортақ көзқарас, тарихи достық, тамаша екіжақты қатынастар және НАТО одақтастығы мен стратегиялық серіктестік негізінде байланысқан екі ел арасындағы диалог пен ынтымақтастықты нығайту үшін берік негіз қалыптастыратыны” айтылды.
Сондай-ақ көпполярлы халықаралық тәртіпке қарай үдей түскен өзгерістің Түркия мен Ұлыбритания үшін тәуекелдерді арттырғанына назар аударылды. НАТО-ның Стратегиялық тұжырымдамасы аясында тежеу мен қорғаныстың Еуро-Атлантикалық қауіпсіздікті қамтамасыз етудегі маңызы сақталып отырғаны атап өтілді.
Мәлімдемеде “Қауіпсіздігіміз бен ұжымдық қорғанысымыздың іргетасы саналатын НАТО саяси және әскери маңызын арттырды”, - делінді.
Қауіпсіздік, экономика және жаһандық сын-қатер бойынша ынтымақтастық
Негіздемелік құжат жаһандық қауіпсіздік, НАТО аясындағы үйлестіру, қорғаныс және өнеркәсіптік ынтымақтастық, терроризммен күрес және гуманитарлық көмек жұмыстарымен бірге Ұлыбритания–Түркия ынтымақтастығын тереңдетуді көздейді. Сонымен қатар климаттың өзгеруі, энергетикалық қауіпсіздік, ғылым, технология және инновация салаларындағы серіктестікті кеңейтуді де қарастырады.
Бірлескен мәлімдемеде Негіздеменің ортақ экономикалық өсімді қолдауға бағытталған “жаңартылған Еркін сауда келісімі” жөніндегі келіссөздерді және “екіжақты сауда мен инвестицияны арттыру ниетін қайта растағаны” айтылды.
