Гонконгтың Тай По ауданындағы сегіз ғимараттан тұратын тұрғын үй кешенінде шыққан өрттен қаза тапқандар саны 44-ке жетті. 279 адам әлі іздестірілуде.

“South China Morning Post” хабарлағандай, өрттен қаза тапқандар саны артуда.

Өрт сәрсенбі күні түскі уақытта 1 900-ден астам пәтері бар кешен аумағында басталған және жөндеу жұмыстарына байланысты ғимараттардың сыртына орнатылған бамбук құрылымдарына байланысты тез таралған.

Жергілікті өрт сөндіру қызметінің мәліметінше, қаза тапқандардың қатарында бір өрт сөндіруші де бар.

Ауруханаға жеткізілген жаралылардың 45-інің жағдайы ауыр екені хабарланды.

Тұрғын саны шамамен 4 000 деп есептелген кешендегі жеті ғимараттың үшеуі өрттен тазартылып, бақылауға алынғанымен, төртеуінде жалын әлі басылмаған.

Жалпы 279 адам іздестірілуде, 26 өрт сөндіру тобы өртпен күресті жалғастыруда.

Полиция жөндеу жұмыстарын жүргізген құрылыс компаниясының екі басшысын және бір инженер-консультантты “абайсызда адам өлтіру” күдігімен қамауға алды.

Билік жөндеу жұмыстарына байланысты орнатылған бамбук құрылымдары мен терезелерді қаптаған көбік пластик материалдардың өрттің жылдам таралуына әсер еткенін анықтады.

Бас комиссар Айлин Чунг Лай-и: “Компанияда жауапты тұлғалардың өрескел немқұрайдылық танытқанына күмәніміз бар. Бұл өрттің жылдам таралуына және көптеген адамның қаза табуына себеп болды”, - деді.